א שאקירנדע אינצידענט וואס האט זיך אפגעשפילט נעכטן נאכמיטאג פארנט פון די בנין הישיבה דחסידי וויען אין קאנארסי, ווען א קאר דרייווער האט פרובירט אריינצופארן אין בחורים און זיי אראפקלאפן, פארנט פון די ישיבה געביידע אויף איסט 55 סטריט און גלענוואד ראוד, האט באוויזן צו איבערנעמען די אלגעמיינע נייעס וועלט, און געשאפן העדליינס אין א רייע ניו יארקער צייטונגען און דזשורנאליסטישע פלאטפארמעס.
די מעשה האט פאסירט ווען דער ווילדע דרייווער איז געקומען צו פארן מיט א ווייסע קאר און זיך אפגעשטעלט נעבן די ישיבה, ער האט אנגעהויבן נאכשרייען עטליכע בחורים וואס זענען געשטאנען אינדרויסן, און דערנאך פרובירט זיי אראפצוקלאפן, ווען די בחורים זענען שנעל אריינגעלאפן אינעם בנין. דאן האט ער זיך ארומגעדרייט און געקומען צו פארן אויף די שטח פון די ישיבה וועלנדיג אריינהאקן אין בחורים, און דערנאך איז ער אוועקגעפארן פון דארט.
חברה שומרים איז שנעל גערופן געווארן אויפן סצענע, און באוויזן צו נאכיאגן די קאר, ביז די פאליציי האט ארעסטירט דעם פארשוין וועלכער האט געשיינט צו שטאמען פון די מיטל מזרח ראיאן. דער פארשוין איז אנגעקלאגט געווארן מיט הארבע קלאגעס, און ווערט געהאלטן אונטער ארעסט אן קיין מעגליכקייט פאר בעיל.
די געשיכטע האט געצויגן אינטערעסע אין די אלגעמיינע פרעסע, א שטייגער ווי א באקאנטע ניו יארקער צייטונג וואס האט אויפן דעקל היינט דאנערשטאג געמאכט די צענטראלע נייעס איבער די געשיכטע, מיט א גרויסע בילד ווי די קאר פרובירט אראפצוקלאפן א מגיד שיעור אין ישיבה, אונטער די ווערטער אז א פארשוין האט פרובירט נאכצויאגן א רבי און ארטאדאקסישע סטודענטן אין ברוקלין אטאקע.
