מטעם קהל יטב לב ד'סאטמאר אין קרית יואל איז היינט געמאלדן געווארן, אז צוליב די ריזן ציבור וואס איז ערווארטעט מיטצוהאלטן דעם קומענדיגן יום טוב שבועות בצל הקודש פון כ"ק אדמו"ר מסאטמאר שליט"א, וועט היי יאר צום ערשט מאל פארקומען א באזונדערע קינדער מנין פאר די ילדי התלמוד תורה.
דאס קומט נאכדעם וואס אין די לעצטערע יארן הערשט א שטארקע געדרענג אין ביהמ"ד הגדול ביי די תפילות דורכאויס יו"ט שבועות, ווען הונדערטער אידן קומען צו פארן פון אלע שטעט, אין צוגאב צו די טויזענטער תושבי קרית יואל וואס קומען דאווענען בצל הקודש פון רבי'ן בהאי יומא רבא זמן קבלת התורה.
די קינדער מנין וועט פארקומען אין א ספעציעלע לאקאל אין געגנווארט פון די גרויסע בית המדרש, פאר אלע קינדער פון כתה ד' ביז כתה ח', סיי די ערשטע טאג יו"ט און סיי די צווייטע טאג, אונטער די אויפזיכט פון א געלונגענע שטאב מחנכים און מלמדי תשב"ר.
