א ביטערע טראגעדיע האט פאסירט נעכטן ביינאכט אין לעיקוואד, וואו א פינף יעריג קינד איז ל"ע טראגיש אומגעקומען נאכן זיין פארמישט אין א שרעקליכע קאר עקסידענט.
דאס קינד הילד שמואל בראג ע"ה, א זון פון הר"ר אברהם בראג הי"ו פון לעיקוואד, און א אייניקל פון הגאון ר' ישראל בראג שליט"א ראש ישיבת תפארת אביגדור אין אהייא, האט זיך געפונען אין א קאר וואס איז געפארן אין די דזשעקסאן געגנט, ביים ווינקל פון איסט וועטעראנס פארקוועי און קליוולאנד קאורט, די קאר האט זיך צוזאמגעקראכט מיט א אנדערע קאר, פון וואס ביידע האבן געליטן גאר שווערע שאדן, און די נישט אידישע דרייווערקע פון די אנדערע קאר איז געשטארבן אויפן פלאץ.
הצלה האבן פרובירט צו ראטעווען דאס קינד וועלכע איז קריטיש פארוואונדעט געווארן אין די קראך, מען האט אים אפגעפירט אין שפיטאל מיטן האפענונג אז ער וועט עס דורכלעבן, אבער ליידער איז ער נפטר געווארן אנקומענדיג אין שפיטאל.
די לוויה קומט פאר היינט האלב נאך איינס נאכמיטאג, ביים בית החיים אויף די זיבעטע סטריט אין לעיקוואד.
שנשמע ונתבשר בשורות טובות.
