א העלישע פייער האט אויסגעבראכן דעם פרייטאג אינדערפרי אין א שוהל געביידע אויף רחוב אברהם שמחי אין רחובות, וואס איז לויט באריכטן געווארן אונטערגעשטעלט דורך א בייזוויליגער פארשוין, וועלכער איז שפעטער ארעסטירט געווארן דורך די פאליציי.
פייערלעשער וואס זענען אנגעקומען אויפן סצענע זענען באלד אריינגעלאפן אינעם בנין טראץ די העלישע פלאמען, און באוויזן ארויסצוראטעווען די פינף ספרי תורה גאנצערהייט ב"ה, די פייער איז פארלאשן געווארן מיט שאדן פאר די בנין, אבער ב"ה נישט פאר צופיל ספרי קודש, און אזוי אויך האט עס נישט געשאפן קיין מענטשליכע שאדן.
די לאקאלע פאליציי האט ארעסטירט א לאקאלער איינוואוינער פון ארום פערציג יאר אלט, וועלכער ווערט באשולדיגט אין אונטערצינדן די געביידע בייזוויליגערהייט.
