די אוהל הק' אויפן בית החיים אין שטאט וויזניץ אין אוקריינע, מקום מנוחת הקודש פון הרה"ק בעל צמח צדיק מוויזניץ זי"ע, זיין זון הרה"ק בעל אמרי ברוך מוויזניץ זי"ע, און נאך עטליכע רבנים בני המשפחה, איז אין די לעצטע פאר יאר אריין אין א ערנסטע בוי פראיעקט צו איבערבויען שיין און פראקטיש די געביידע, אבער די לעצטע צוויי יאר האט זיך די בוי ארבעט אפגעשטעלט צוליב די ארטיגע מלחמה.
די בוי פראיעקט איז געווארן אונטערגענומען דורך חבורת הגן הנאה, וואס איז עוסק צו פאראייביגן די היסטאריע פון אדמור"י בית וויזניץ, מיטן הילף פון הרב ישראל מאיר גבאי שליט"א יו"ר אגודת אהלי צדיקים. און עס ווערט פינאנצירט מיט די שטיצע פון משפחת הרה"ח ר' חיים משה פעלדמאן ע"ה, און הרה"ח ר' פנחס ניימאן שליט"א, מגדולי נדיבי הלב בחצרות הקודש וויזניץ.
מיט איבער צוויי יאר צוריק, ווען עס האט אויסגעבראכן די שרעקליכע מלחמה אין אוקריינע, איז אריין אין קראפט א געזעץ אז אלע מענער ביז זעכציג יאר אלט מוזן אריינקומען דינען אין מיליטער, די געזעץ ווערט שטרענג אינפאסירט דורך די לאקאלע פאליציי, אזוי ארום אז עס איז פשוט נישט דא צו געפונען קיין ארבייטער אין גאנצן לאנד.
צוויי יאר איז די נייע אוהל הק' געשטאנען האלב געבויעט האלב רוי, רעגן האט אריינגעגאסן שאפנדיג שאדן פאר די געביידע, און שווערע פלאג און מיה פון לאנגע יארן האט אנגעהויבן גיין לאיבוד, אין די צייט וואס עס איז פשוט נישט געווען מעגליך צו טרעפן ארבייטער צו פאראויסגיין מיט די בוי פראיעקט.
היינט אבער איז מיט גרויס סייעתא דשמיא צוריק באנייעט געווארן די בוי ארבעט, נאך וואס די עסקנים האבן געטראפן געציילטע עלטערע לייט וואס זענען גרייט געווען אנצונעמען די ארבעט, און נאכן ערהאלטן די זעלטענע פערמיטן האט מען צוריק אנגעהויבן די בוי ארבעט אין פולן קראפט.
