טויזענטער חסידי גור וועלן זיך היינט אויפדערנאכט צוזאמקומען אויף ספעציעלע מסיבות און מעמדים אין יעדע גערער שטיבל בכל קצוי תבל, מיטן איינציגן ציהל צוצולייגן א פלייצע פאר די הנהלת בית המדרש הגדול דחסידי גור אין ירושלים, וועלכע זענען עוסק די טעג צו פארענדיגן דעם בנין ביהמ"ד הגדול מיט אלע אפטיילונגען.
די גרויסע בנין בית המדרש אויף רחוב ירמיהו, די צענטראלע ווענדפונקט פון יעדע גערער חסיד בכל מקום שהוא, איז שוין אריבער מערערע בוי פראיעקטן און רענאוואציע ארבעט, נאך וואס אזא ריזן בנין ווערט נישט פארענדיגט אין א אויגן בליק, און כסדר דארף מען אונטערנעמען א פרישע פראיעקט צו פארענדיגן נאך א אפטיילונג אינעם בנין.
אצינד האט די הנהלת ביהמ"ד הגדול פראקלאמירט א אלוועלטליכע קאמפיין "אחת ולדורות", מיטן ציהל צו פארענדיגן אלע אפטיילונגען אינעם בנין וואו מען ברויך נאך ארבעטן, א שטייגער ווי די אונטערשטע שטאק און די גרויסע מקוה וואס ווערט געבויעט אינעם ריזן געביידע.
אויף היינט דאנערשטאג נאכט ליל ראש חודש סיון, איז באשטימט געווארן א אלוועלטליכע קייט פון מסיבות נהדרות צו מזכה זיין יעדן איינציגן חסיד צו זיין א שותף אין דעם הייליגן פראיעקט, אין יעדן שטיבל פון חסידי גור וועט פארקומען א באזונדערע מעמד, אלע אין די זעלבע צייט, און די שטיבלעך וואס קענען נישט אפרעכטן די מעמד אינעם שטיבל זעלבסט, דינגען ארויס ספעציעלע זאלן דערפאר.
