פרייליכע נייעס איז געמאלדן געווארן דעם יום טוב שבועות בחצר הקודש וויזניץ אין מאנטריאל, איבער די עפענונג פון א פרישע רינגעלע אין די קייט פון מוסדות וויזניץ אין שטאט, א ישיבה לצעירים וואס וועט געעפנט ווערן דעם קומענדיגן שנת הלימודים בעז"ה, נאכפאלגענדיג די גרויסע הצלחה מיט די תלמוד תורה און מיידל שולע וואס וואקסט און בליהט.
די נייע ישיבה קטנה ווערט געעפנט צום קומענדיגן יאר חודש חשון תשפ"ה, און וועט באגלייט ווערן אויף א פערזענליכע פארנעם דורכ'ן נשיא המוסדות כ"ק אדמו"ר מוויזניץ שליט"א פון מאנטריאל, וועלכער וועט משפיע זיין פאר די תלמידים תורה וחסידות און יראת שמים אויף א כסדר'דיגע פארנעם.
היינט מאנטאג אויפדערנאכט קומט פאר די אסיפת היסוד, וואו עס נעמען זיך צוזאם אלע עלטערן וואס גייען שיקן די בחורים אין די נייע ישיבה, וואו דער רבי וועט אויפטרעטן מיט דברות קודש און דברי ברכה, און עס וועט געמאלדן ווערן די גענויע פלענער און דעטאלן איבער די נייע ישיבה.
אויפן גוטהייסונג פונעם וויזניצער רבי'ן שליט"א, וועט די ישיבה טראגן דעם נאמען "אמונת מרדכי" וויזניץ, לשמו ולזכרו פון אביו הגדול כ"ק אדמו"ר הרה"ק בעל תורת מרדכי מוויזניץ זי"ע, וועלכער האט כל ימי חייו עוסק געווען צו פארשפרייטן אמונה ביי די תלמידים און חסידים אין יעדע געלעגנהייט.
