דעם זונטאג אינדערפרי וועלן הונדערטער איינוואוינער אין סקווירא שטעטל ארויסקומען ברחובה של עיר אויף א מלכות'דיגע אויפנאמע, ווען עס וועט קומען באזוכן אין שטעטל דער הויכגעשעצטער ספיקער אוו די האוז מייק דזשאנסאן, וועלכער איז דער דריטער מאכטפולער פערזאן אין די פאראייניגטע שטאטן.
ספיקער דזשאנסאן קומט קיין ראקלענד קאונטי, צו באשיינען א פאנדרעיזינג אווענט פאר זיין פריינט קאנגרעסמאן מייק לאולער וואס פארטרעט די היימישע געגנט אין מאנסי און שיכון סקווירא. אין ראם פון זיין באזוך וועט ער אריינגיין אל הקודש פנימה ביי כ"ק אדמו"ר מסקווירא שליט"א אפצונעמען ווארעמע וואונטשן, די באזוך וועט זיין אין די צופרי שעות נאך פארן דאווענען ביים סקווירא רבי'ן שליט"א.
אויפן גוטהייסונג פונעם רבי'ן שליט"א, וועלן אלע חסידים און תלמידי המוסדות ארויסקומען ברחובה של עיר באגריסן דעם הויכגעשעצטן ספיקער, גענוי ווי עס האט זיך אפגעשפילט פארלאפענע יאר ווען דער געוועזענער ספיקער מעקארטי האט באזוכט אין שטעטל, די קינדער פון חדר און בחורי הישיבות וועלן אפגעבן דעם כבוד של מלכות ווי עס פאסט, באגלייט מיט אויפנאמס ווערטער דורך די לאקאלע עסקנים און פאליטיקאנטן.
