היינט י"ז סיון ביומא דהילולא קדישא פונעם אלטן רבי'ן פון קארלין דער הייליגער בית אהרן זי"ע, קומט פאר א גאר רירנדע און היסטארישע מעמד הנחת אבן הפינה אין שטאט מאלינוב אין אוקריינע, מקום מנוחת הקודש פונעם בעל ההילולא, וואו עס וועט ווערן אויפגעבויעט א פראכטפולע בנין הכנסת אורחים, א ישיבה על קברו, א בית המדרש מיט אלע באדערפענישן לכל דורש ומבקש.
אין די יעצטיגע טעג זענען חסידי קארלין סטאלין איבערראשט געווארן מיט די היסטארישע אויפדעקונג, אז מען האט געטראפן די צוואה פונעם הייליגן בית אהרן זי"ע פארשטופט אין די רעגירונגס ארכיוון, העכער הונדערט פופציג יאר זינט די פטירה איז די צוואה געפונען געווארן, וואו דער הייליגער בית אהרן זי"ע בעט פון זיין זון און נאנטע משפחה זיי זאלן אויפבויען א בית המדרש נעבן זיין ציון, א פלאץ וואו אידישע קינדער זאלן קענען שופך שיח זיין און זיך דערכאפן דאס הארץ ווען זיי קומען דאווענען ביים ציון הק'.
די דאטום ווען די צוואה איז געשריבן געווארן איז אנגעצייכנט אויף עטליכע שעה איידער די הסתלקות פונעם הייליגן בית אהרן זי"ע, ליל י"ז סיון תרל"ב, אין די צוואה שרייבט ער איבער די ירושה און די אריבערגאנג פון זיין פארמעגן צו זיין זון הרה"ק רבי אשר מסטאלין זי"ע. אזוי אויך בעט דער בית אהרן אז די קינדער זאלן קומען דאווענען ביים ציון הק' צוויי מאל א יאר.
ערשטע פלענער אויפצובויען א בנין הכנסת אורחים נעבן דעם ציון הק' אין שטאט מאלינוב אין אוקריינע, גייט שוין צוריק א שיינע פאר יאר בברכתו ובעידודו פון כ"ק אדמו"ר מקארלין סטאלין שליט"א, אבער אין די לעצטע צוויי יאר צוליב די מלחמה אין אוקריינע זענען די פלענער עטוואס פארשטילט געווארן.
אצינד מיטן טרעפן די היסטארישע צוואה, האט כ"ק אדמו"ר מקארלין סטאלין שליט"א געהייסן שוין אריינשפרינגען אין דעם פראיעקט לעשות רצון צדיק, אויסצופירן זיין הייליגע וואונטש אז מען זאל בויען א שוהל נעבן דעם ציון הק', און היינט זונטאג בעצם יומא דהילולא קדישא וועט געלייגט ווערן די גרונדשטיין באותו מקום, במעמד אלפי חסידים, הונדערטער אידן וואס זענען געקומען צו פארן קיין מאלינוב פוקד זיין דעם ציון הק', ובראשם כ"ק אדמו"ר מקארלין סטאלין שליט"א אייניקל און ממשיך דרכו פונעם בעל ההילולא.
