מיט גרויס פרייד ווערט אויפגענומען די נייעס פון מחנה אהל ברוך קראסנא, אז הנהלת מחנה אהל ברוך קראסנא האט געשלאסן מקח אויף צוויי גיגאנטישע שטחים הארט נעבן די קעמפ אויף אנאוואנע לעיק אין מאנטיסעלא, כדי צו קענען פילפאכיג פארברייטערן די קעמפ מיט נאך געביידעס און שפיל פלעצער, מיטן בליה און וואוקס וואס האלט אן יאר יערליך.
דאס קומט געציילטע טעג איידער די טויזענטער קינדערלעך תלמידי המחנה גרייטן זיך אנצוקומען אין קעמפ אויף א העכסט ערווארטעטע פרייליכע זוממער סעזאן, און די וועד ההנהלה קלארט שוין אויס די גענויע פלענער וואס צו בויען און וויאזוי, צו ברענגען די מאקסימום הרחבת הדעת פאר די טייערע קינדערלעך.
צווישן די פלענער רעדט מען פון אויפבויען שפאגל נייע בנינים פאר קלאס צימערן, נייע דארמיטארי געביידעס מיט צענדליגע שלאף צימערן פאר די קינדער, ריזיגע שטחים צו שפילן אין לויף פונעם טאג, א נייע גרויסע פארקינג לאט פאר קארס, און א באזונדערע לאט פאר די צענדליגע באסעס, און נאך פארשידענע וויכטיגע בנינים וואס פעלט זיך אויס צו קענען אפערערירן אזא מאסיווע קעמפ.
די צענטראלע פונקט אינעם פרישן פראיעקט, וועט זיין אויפצובויען א שפאגל נייע גיגאנטישע לאנטשרום, וואס זאל קענען אקאמאדירן אלע ילדי המחנה מיט הרחבת הדעת, זייענדיג א פאקט וואס פלאגט די הנהלת המחנה דערווייל, ווען עס איז פשוט נישטא קיין ארט וואו צו פלאצירן אזויפיל קינדער בליעה"ר.
לכבוד די געוואלדיגע דערגרייכונג, איז הגה"צ גאב"ד קראסנא שליט"א נשיא המחנה ספעציעל אראפגעפארן קיין מאנטיסעלא צו זעהן די נייע שטחים פון די נאנט, און אזוי אויך אפגעראכטן א פרייליכע מסיבת לחיים לכבוד די גמר המקח.
