ביי א ענגע אסיפה בביתו נאוה קודש פון כ"ק אדמו"ר מתולדות אברהם יצחק שליט"א וועלכער האלט זיך אויף די טעג אויף אפרוה אין הר יונה, האט דער רבי באאויפטראגט אלע זיינע קינדער הרבנים הגאונים שליט"א, זיי זאלן ארויספארן אויף א פאראייניגטע נסיעה קיין אמעריקע צו שאפן גרויסע געלטער פאר די קרן הבנין, אויפצובויען די נייע גרויסע בית המדרש דחסידי תולדות אברהם יצחק וואס ווערט געבויעט לשם ולתפארת בעיר הקודש ירושלים.
די בוי ארבעט גייט אן אין פולן שוואונג, ווען אין די זעלבע צייט ארבעטן די עסקנים צו שאפן די נויטיגע געלטער אנצוגיין מיט די בוי ארבעט, אין די לעצטערע טעג האט דער רבי ממנה געווען א וועד פון דריי חשובע בעלי בתים ונגידים וואס זאלן שטיין אין שפיץ פון די קרן הבנין קאסע, הנגיד החסיד ר' שמואל הורוויץ הי"ו פון מאנסי, הנגיד החסיד ר' אברהם יודא ראזענבערג הי"ו פון וויליאמסבורג, און הנגיד החסיד ר' שמעי' צבי רייך הי"ו.
איבער די בעפארשטייענדע פלענער צו שאפן די נויטיגע סכומים פאר די בוי פראיעקט, איז פארגעקומען א אסיפה בביתו נאוה קודש פונעם רבי'ן שליט"א אין הר יונה, וואו עס האבן זיך פארזאמלט די חברי הוועד און די קינדער פונעם רבי'ן, אינאיינעם מיטן לעגענדארער וועלטס עסקן און פה מפיק מרגליות הר"ר מאיר מרדכי בערקאוויטש הי"ו, און דערביי האט דער רבי געבעטן פון זיינע קינדער הרבנים הגאונים ארויסצופארן אויף א געמיינזאמע נסיעה צו מזכה זיין תושבי חוץ לארץ צו נעמען א טייל אין דעם מאסיוון און וויכטיגן פראיעקט.
די זעקס זיהן פונעם רבי'ן, הגה"צ ר' אהרן ראש הישיבה, הגה"צ ר' חיים מאיר רב אין ביתר, הגה"צ ר' דוד צבי רב אין בית שמש, הגה"צ ר' ישראל רב אין בארא פארק, הגה"צ ר' יואל רב אין לאנדאן, און הגה"צ ר' בעריש רב אין הר יונה, וועלן אינאיינעם ארויספארן דעם קומענדיגן זונטאג קיין אמעריקע, און באשיינען א רייע מסיבות און רייכע באנקעטן לטובת די קרן הבנין, בשליחות הקודש פון זייער גרויסן פאטער דער רבי שליט"א.
