אין ליכט פון די אנגעצויגענע מלחמה צושטאנד אין ארץ ישראל, ווען איראן סטראשעט מיט א שארפע נקמה אין רעאקציע צום טויט פון איסמאעיל האניא דער הויפט פון כאמאס, איז היינט געמאלדן געווארן דורך עטליכע ישיבות וואס זענען סטאנציאנירט אין צפון, אז זיי וועלן זיך אויף צייטווייליג אריבערציען מער קיין דרום ארץ ישראל עד יעבור זעם.
אין די זעלבע צייט שטייגט די אנגעצויגענקייט אין צפון ארץ ישראל נאנט צום לבנון גרעניץ, נאכן אטענטאט אויפן צווייט העכסטע קאמאנדיר פון די כיזבאלא טעראר גרופע. די אנגעצויגענקייט אין ארץ ישראל שפירט זיך אין יעדן שטאפל, לופטליניעס האבן אפגערופן געפלאנטע רייזעס אריין און ארויס פון לאנד, טרעוול ווארענונגען איז ארויסגעשטעלט געווארן דורך מערערע לענדער, און ווי איראן זאגט גרייטן זיי זיך צו העפטיג אטאקירן מדינת ישראל אויף א פארנעם ווי קיינמאל בעפאר.
צווישן די פילע ישיבות און כוללים וואס האבן אפגערופן די סדרי הלימודים אין צפון, ציילט זיך די גרויסע גערער ישיבה וואס איז איינקוואטירט אין שטאט חצור אין צפון ארץ ישראל, ווען על פי הוראת הקודש פון כ"ק אדמו"ר מגור שליט"א וועלן די בחורי הישיבה זיך אריבערציען אצינד קיין ירושלים און קובע זיין שיעורי תורה אין ביהמ"ד הגדול דחסידי גור, ביז די אנגעצוינקייט וועט זיך בארואיגן בעז"ה, עד יעבור זעם.
