די מדינת ישראל מיליטער האט היינט געמאלדן זייער באשלוס אז אין בעפארברייטונג צום יומא דהילולא קדישא פונעם הייליגן אריז"ל זיע"א וואס געפאלט אויס דעם פרייטאג ה' אב, וועט די גאנצע געגנט פון די ציון הק' ווערן פארשלאסן פאר מתפללים, אין ליכט פון די אנגעצויגענע מלחמה צושטאנד וואס הערשט אין ארץ ישראל.
דאס קומט געציילטע חדשים נאך וואס זיי האבן געטון דאס זעלבע מיט אתרא קדישא מירון ביום ל"ג בעומר, ווען אידישע קינדער האבן ליידער נישט זוכה געווען אנצוקומען צום ציון הרשב"י אינעם גרויסן טאג ביומא דהילולא. אצינד ווען די מלחמה פולווער שפירט זיך שטארק אנגעצויגן, איבערהויפט אין די צפון געגנטער נעבן די לבנון גרעניץ, ווי עס איז פארהאן א שטארקע ריזיקע פאר א אטאקע פון כיזבאלא, איז ווידער געמאלדן געווארן פון די מדינת ישראל מיליטער אז זיי וועלן נישט ערלויבן קיין מתפללים ביים ציון הק' פונעם הייליגן אריז"ל.
די טאג ה' אב איז יאר יערליך א זמן קיבוץ גליות, וואו עס קומען זיך צוזאם צענדליגע טויזענטער אידן פון אלע שיכטן און קרייזן, צו דאווענען און מעורר זיין רחמים ביים ציון הק' אין טאג פון די יארצייט, דאווענען א תפילה בבית מדרשו פונעם אר"י הקדוש, און זיך טובל'ן אין די היסטארישע מקוה האר"י.
