אלפי חסידי חב"ד האבן אויפגענומען מיט באדויער די פרישע נייעס, אז אן אפעלאט געריכט אין ניו יארק האט אראפגענומען די סאנקציעס וואס איז געשטעלט געווארן אויף רוסלאנד, ווילאנג זיי געבן נישט צוריק די באקאנטע "אוסף שניאורסאן" פאר אגודת חסידי חב"ד, וועלכער איז דער לעגאלער אייגענטומער פון די היסטארישע זאמלונג.
די געשיכטע גייט צוריק לאנגע יארן און האט שוין דורכגעמאכט אסאך רייזעס, די רעדע איז פון א היסטארישע זאמלונג מיטן נאמען "אוסף שניאורסאן" וואס אנטהאלט גנזי הקודש פון די ערשטע פינף רבי'ס לבית חב"ד, אריינגערעכנט צוועלף טויזענט ספרי קודש און פופציג טויזענט בריוון. די זאמלונג איז קאנספיקירט געווארן דורך די רוסישע רעגירונג מיט איבער הונדערט יאר צוריק, ווען די ליובאוויטשע רבי'ס האבן געדארפט גיין גלות פון איין ארט צום אנדערן.
כ"ק אדמו"ר מליובאוויטש זצ"ל האט געשטעלט ספעציעלע שלוחים זיי זאלן עוסק זיין צוריקצוברענגען דעם זאמלונג צו חב"ד, אויף סיי וועלכע מעגליכע וועג, איינער פון די מיטלען וואס מען האט פרובירט, איז געווען צו אנקלאגן רוסלאנד אין אמעריקאנער געריכט, אז זיי רויבן צו דאס אייגענטום פון "אגודת חסידי חב"ד", וואס פארפיגט אויף אלע אנגעלעגנהייטן אין חב"ד לויט די הוראה פונעם לעצטן ליובאוויטשער רבי'ן זצ"ל.
די געריכט האט טאקע געאורטיילט אז רוסלאנד איז פארפליכטעט צוריקצוגעבן דעם אוצר פאר חב"ד, און כדי אז רוסלאנד זאל שפירן א פליכט דאס צוריקצוגעבן, איז ארויפגעשטעלט געווארן סאנקציעס אויף רוסלאנד, אז זיי דארפן באצאלן פופציג טויזענט דאללער יעדן טאג וואס זיי האלטן עס ביי זיך.
אין פאקט אבער האט רוסלאנד נישט בלויז איגנארירט די גאנצע געשיכטע, נאר אריינגעגעבן אן אפיעל אין געריכט אז א ציווילע ארגענעזאציע קען נישט אנקלאגן א זעלבסטשטענדיגע מדינה פאר פריוואטע אינטערעסן. דעם דאנערשטאג האט אן אפעלאט ריכטער ארויסגעגעבן דעם אורטייל אז רוסלאנד איז גערעכט, און חב"ד קען זיי נישט אנקלאגן אדער ארויפשטעלן סאנקציעס.
טראץ וואס עס איז קלאר אז די זאמלונג געהערט פאר חב"ד, איז אבער מאמענטאל נישט פארהאן קיין קלארע ליניע וויאזוי ארויסצוזעהן די זאמלונג פון זייערע הענט, איבערהויפט נאך אזא קלארע אורטייל אין אמעריקע. אבער ווי פארשטענדליך וועלן חסידי חב"ד קיינמאל נישט אויפגעבן, טוענדיג אלעס מעגליך אויסצופירן די בקשה פון זייער רבי'ן אז מען זאל טון השתדלות אויסצולייזן דעם זאמלונג.
