שטייענדיג עטליכע וואכן נאך די שרעקליכע פייער וואס האט פארניכטעט די שול געביידע אין קעמפ מאמינים אין סוואן לעיק, וואו עס איז ליידער פארברענט געווארן ארום צוויי הונדערט פאר תפילין ה"י, און צוגאב צו נאך פילע ספרי קודש וואס האבן זיך געפונען אין די געביידע, איז באשטעטיגט געווארן אז די מעמד הקבורה וועט פארקומען מארגן תשעה באב, ביום שריפת בית אלקינו, ווען אידישע קינדער טרויערן אויפן חורבן בית המקדש און גלות השכינה.
די מעמד הקבורה וועט פארקומען אויפן בית החיים פון "חסד של אמת" אין וואודרידזש, וואס געפונט זיך אויף 113 אלד טורנפייק. עס וועט געהערט ווערן דברי התעוררות פון רבנים און מגידים, און דאן וועט מען באערדיגן די כתבי קודש כדת וכדין. דערביי וועט אויך פארקומען די יערליכע מעמד הקמת מציבות, וואו חסד של אמת וועט שטעלן מציבות אויף הונדערט און פערציג נייע קברים פון מתי מצוה, וואס זענען באערדיגט געווארן דורכאויס די פארלאפענע יאר.
