כ"ק אדמו"ר מוויזניץ שליט"א פון לאנדאן וועט מארגן ארויספארן אויף א דריי וואכעדיגע נסיעה קיין ניו יארק, אין ראם פון די יערליכע זוממער האלידעיס ווען כמעט אלע חסידישע אידן פון לאנדאן לאזן זיך ארויס אויף די וועגן און שטעגן צו שעפן פרישע כוחות לעבודת הבורא, שטייענדיג בעפאר די נייע שנת הלימודים לקראת חודש אלול הבעל"ט.
אויף היי יאר האט דער רבי אויסגעקליבן צו וויילן די קומענדיגע דריי וואכן אין קרית וויזניץ קייאמישע לעיק, אויף די קאנטרי בערג בנאות דשא, דער רבי וועט האבן די אכסניא בבית בנו הגדול הגה"צ ר' מנחם שלמה האגער שליט"א, און וועט דאווענען די תפילות דורכאויס די וואכן טעג איינגעטיילט צווישן ביהמ"ד הגדול אין שטעטל, די ישיבה גדולה בנין אבות וויזניץ, און ביים רבינ'ס אכסניא.
דער רבי וועט זיך ארויסלאזן אין וועג מארגן דאנערשטאג נאך תפילת שחרית, און מאכן א קורצן אפשטעל פון בלויז צוויי שעה אין טאראנטא קאנאדע, אויף סידור קידושין ביי די חתונה בבית הנגיד החסיד ר' מרדכי איינהארן הי"ו, א זון פון הנגיד החסיד ר' אברהם שלמה איינהארן הי"ו ראה"ק וויזניץ בארא פארק.
דעם שבת וועט דער רבי פראווענען אין קרית וויזניץ קייאמישע, אינאיינעם מיט אחיו הגדול כ"ק אדמו"ר מוויזניץ שליט"א פון קייאמישע, די נאכפאלגענדע שבתים פרשת עקב און פרשת ראה, וועט דער רבי פראווענען איין שבת אין מאנסי אינאיינעם מיט אחיו הגדול כ"ק אדמו"ר מוויזניץ שליט"א פון מאנסי, און איין שבת אין וויליאמסבורג בצל חותנו הגדול כ"ק אדמו"ר מקאלוב שליט"א.
דורכאויס די דריי וואכן וועט דער רבי אויפנעמען דעם ציבור יעדן טאג נאך תפילת שחרית און צווישן מנחה און מעריב, קומענדיגע וואך מיטוואך וועט דער רבי באשיינען די שמחת החתונה בבית גיסו כ"ק אדמו"ר משאץ שליט"א, די כלה א אייניקל פון הרה"ק בעל תורת מרדכי מוויזניץ זי"ע וואס קומט פאר אין מאנסי.
