כ"ק אדמו"ר מתולדות אברהם יצחק שליט"א וועלכער איז צוגאסט די טעג אין ניו יארק לטובת די אויפבוי פון די נייע בנין ביהמ"ד הגדול אין ירושלים, איז דורכאויס די נאכט אריינגעפירט געווארן צו די מאונט סיני שפיטאל אין מאנהעטן, נאך שוועריגקייטן מיטן אטעם און א ערנסטע שוואכקייט.
דער רבי געפונט זיך שוין מער ווי א וואך צייט אין ניו יארק, בבית האכסניא אין די וואודבארי דזשאנקשען געגנט אין קרית יואל, דער רבי וועלכער איז זייער שוואך די לעצטע תקופה, איז געקומען צו פארן בשארית כוחותיו אויפצוטרייבן גרויסע סכומים צו פארזיכערן די אויפבוי פון די נייע ביהמ"ד הגדול לרווחת הציבור, אין באגלייטונג פון א מעדיצינישע שטאב צו פארזיכערן דעם רבינ'ס געזונט צושטאנד.
נאכן פאסטן א גאנץ תשעה באב איז דער רבי געווען זייער אפגעשוואכט, און שוין אויף מעריב און קידוש לבנה איז דער רבי נישט ערשינען בקרב חסידיו נאר געדאווענט פריוואט אינדערהיים. שפעט ביינאכט איז דער רבי געווארן אפגעפירט אין שפיטאל פאר אונטערזוכונגען, און ווי די דאקטוירים זאגן איז דער רבי אפגעשוואכט פונעם תענית, וואס האט צוגעברענגט וואסער אין די לונגען און א שווערע אטעם.
די האפענונג איז אז דער רבי וועט באפרייט ווערן בקרוב לבית האכסניא אין קרית יואל. אידן זענען מתפלל לרפואתו, כ"ק מרן רבי שמואל יעקב בן יענטא לרפואה שלימה.
