א פרישע ווארענונג ווערט היינט געמאלדן דורך וועד משמרת כהונה, וואס ווערט געפירט דורך הגה"צ ר' יצחק שטיין שליט"א ראב"ד פאלטישאן, אנבאלאנגט די טומאת אהל וואס איז פארהאן אויף עטליכע גאסן אינעם עיר ואם בישראל בארא פארק.
די רעדע איז פון צוויי גרויסע סעמעטעריס וואס געפונט זיך אויף די צוויי זייטן פון די חסידישע בארא פארק, די וואשינגטאן סעמעטערי ביי די צוואנציגסטע עוועניו, און די גרינוואוד סעמעטערי הארט נעבן פארט העמילטאן פארקוועי. די פראבלעם אז ביימער פון די סעמעטערי שטעקט זיך ארויס העכער די ארומיגע גאסן איז שוין אן אלטע, און מיט עטליכע יאר צוריק איז שוין אונטערגענומען געווארן פארשידענע שריט אפצושניידן די ביימער, אין צוזאמענהאנג מיט די סעמעטערי און פארקס פארוואלטונג וואס פארפיגט דערויף.
אין א פרישע מודעה געמאלדן היינט דורך וועד משמרת כהונה, ווערט קלארגעשטעלט אז טראץ וואס מען האט שוין געשניטן די ביימער מיט צוויי יאר צוריק, איז עס שוין דורכאויס די צייט צוריקגעוואקסן, און די עסקנים ארבעטן אצינד מיט די באעהרדע צו ערהאלטן פערמיטן נאכאמאל אפצושניידן די ביימער, אז כהנים זאלן קענען אדורכפארן אויף די ארומיגע גאסן.
ביזדערווייל אבער ווילאנג עס ווערט נישט אפגעשניטן, איז פארהאן א איסור פאר כהנים צו פארן דארט, עס נעמט אריין די פארט העמילטאן פארקוועי און מעקדאנאלד עוועניו נעבן די גרינוואוד סעמעטערי, און די צוואנציגסטע עוועניו און בעי פארקוועי נעבן די וואשינגטאן סעמעטערי, און די איסור איז אויף אלע לעינס, אויסער די ווייטסטע לעין וואס איז שוין נישט אונטער די ביימער.
אזוי אויך שרייבן זיי אז אויף אושען פארקוועי און די איין און צוואנציגסטע עוועניו, וואס איז אויך נעבן די סעמעטערי, האט מען שוין באוויזן אפצושניידן די ביימער וואס האבן זיך ארויסגעשטעקט, דעריבער קענען כהנים פארן דארט אן קיין פראבלעם.
