חסידי סאטמאר אין מאנסי האבן אויפגענומען מיט פרייד די פרישע נייעס פון הרחבת גבולי הקדושה, ווען אין די יעצטיגע טעג איז די הנהלה פון ביהמ"ד יטב לב ד'סאטמאר סטאנציאנירט אויף רוט 306, אריין אין קאנטראקט אפצוקויפן א געביידע אלס אכסניא של תורה תפילה, בברכת הקודש פון כ"ק אדמו"ר מסאטמאר שליט"א, און דער נשיא הקהילה הגה"צ גאב"ד סאטמאר מאנסי שליט"א.
דאס קומט נאך די מאסיווע בליה און וואוקס פון תלמידי וחסידי סאטמאר אין שטאט מאנסי, ווען אין די לעצטע פאר יאר איז געעפנט געווארן פרישע בתי מדרשים אין עטליכע ווינקלען פון די שטאט. איין נייע בית המדרש האט זיך געעפנט עטליכע יאר צוריק ביים ווינקל פון רוט 306 און ריטא עוועניו, און איז אויסגעשטיגן אלס א תל תלפיות פאר סאטמארע חסידים פון די גאנצע אומגעגנט.
די הנהלת הקהילה האט ארומגעזוכט א לענגערע צייט נאך א פאסיגע מקח צו קענען איינקוואטירן די בית המדרש אין א אייגענע בנין, פארלאפענעם פרייטאג איז געמאלדן געווארן די פרייליכע בשורה אין א מזל'דיגע שעה אז מען איז אריין אין קאנטראקט אפצוקויפן א געביידע ביים ווינקל פון קרעסטוויו און 306, וואס וועט פארוואנדלט ווערן אלס אכסניא של תורה ותפילה אין די נאנטע צוקונפט, נאכן דורכפירן טיילווייזע רענאוואציעס אהערצושטעלן א בית מקדש לה' ולתורתו.
