א באזארגענדע אינצידענט וואס האט זיך אפגעשפילט דורכאויס די נאכט אין די קעטסקיל בערג, האט זיך ב"ה געענדיגט מיט א גוטע טעם, ווען צוויי פארלוירענע בחורים וואס זענען פארשוואונדן געווארן נעכטן ביינאכט אין די סלייד מאונטען טרעיל, זענען ב"ה אפגעפונען געווארן היינט צופרי אין א גוטע צושטאנד.
די צוויי ברידער בחורים, איינער איין און צוואנציג יאר אלט, און דער צווייטער זיבעצן יאר אלט, זענען ארויס שפאצירן נעכטן נאכמיטאג ביי די סלייד מאונטען טרעיל וואס געפונט זיך עטוואס ארויפציהר פון די היימישע קאנטרי בערג, די צוויי האבן גערופן זייער מאמע ארום אכט אזייגער ביינאכט אז זיי האבן פארלוירן די וועג, און א קורצע צייט שפעטער האבן זיי מער נישט געהאט קיין טעלעפאן סערוויס.
א העפטיגע זוכעריי איז אונטערגענומען געווארן דורך מערערע אגענטורן, אריינגערעכנט חברים ד'ראקלענד, קעטסקילס הצלה, סטעיט פאליציי, און די וואלאונטירן פון די מציל ארגענעזאציע וואס זענען גוט טרענירט צו דורכאקערן פעלדער און וועלדער אפירצוזוכן פארלוירענע מענטשן. למעשה איז געווען היבש שווער די זוכעריי און האט זיך געצויגן א גאנצע נאכט אן אויפהער.
היינט צופרי איז ערהאלטן געווארן א מעסעדזש אז א קאר דרייווער האט באמערקט צוויי בחורים אין א פארלוירענע צושטאנד, וואנדערן אויף א געסעלע צווישן די בערג ארום זיבן דרייסיג צופרי. נאך א סוקסעספולע רעטונג אפעראציע זענען די צוויי בחורים אפגעפונען געווארן אין א גוטע צושטאנד ב"ה.
