א מאסיווע זוכעריי איז אקטיוו אינעם ווייטן אריזאנע, נאך וואס א אכט יעריג קינד איז ליידער פארשוואונדן געווארן פון האריזאנט נעכטן נאכמיטאג, דורכאויס א שפאציר אין די לאווא ריווער קעיווס, און איז דערווייל נאכנישט געפונען געווארן, שאפנדיג אנגסט ביי גאנץ כלל ישראל איבער די וועלט.
דאס קינד מיטן נאמען "ציון מאראן" וועלכער וואוינט אין באלטימאר, איז ארויס נעכטן אויף א שפאציר מיט זיין פאמיליע, אין די לאווא ריווער קעיווס אין פלעגססטעף אריזאנע, ארום זעקס אזייגער נאכמיטאג איז ער פארשוואונדן געווארן ווען די משפחה קען נישט דערגיין די שפורן וואו ער איז אהינגעגאנגען, און זיי האבן אנגעהויבן זוכן נאך אים אין די גאנצע געגנט.
וואלאונטירן און עמערדזשענסי אגענטורן פון די געגנט זענען אנגעקומען ארויסהעלפן מיט די זוך אקציע, פארעסט רעינדזשערס זענען אראפגערופן געווארן דורכצואקערן די גאנצע געגנט, אבער צוליב די שווערע וועטער אין לויף פון די נאכט האבן זיי נישט געקענט אנגיין געהעריג מיט די זוכעריי.
א שיינע גרופע פון אידישע וואלאונטירן פון ניו יארק האבן זיך ארויסגעלאזט מיט א פליגער פון די הצלה עיר ארגענעזאציע, דעם לאנגן וועג קיין אריזאנע ארויסצוהעלפן מיט די זוכעריי, עס נעמען אנטייל וואלאונטירן פון חברים אוו ראקלענד קאונטי, וואלאונטירן פון די מציל ארגענעזאציע, און פון הצלה עיר ארגענעזאציע.
די וואלאונטירן זענען שוין אנגעקומען אויפן סצענע און האבן זיך ארויסגעלאזט ארויסהעלפן די זוך אקציע מיט שטארקע האפענונג צו טרעפן דאס קינד געזונט און שטארק. אין די זעלבע צייט טוט גאנץ כלל ישראל מתפלל זיין מען זאל טרעפן דאס קינד געזונטערהייט, ציון בן חי' רבקה, בקרוב ממש.
