התרגשות'דיגע פרייליכע נייעס קומט יעצט אריין פון אריזאנע, אז דאס פארלוירענע אינגל אויף וואס כלל ישראל האט איינגעריסן די לעצטערע שעה'ן מען זאל אים טרעפן בשלום, איז יעצט אפגעפונען געווארן אין א גוטע צושטאנד ב"ה, זייענדיג פארלוירן צווישן די געדעכטע ביימער אין די לאקאלע וואלד.
דאס קינד "ציון מאראן" איז פארלוירן געווארן נעכטן נאכמיטאג אין די לאווא ריווער קעיווס אין פלעגסטאן אריזאנע, צענדליגע וואלאונטירן און עמערדזשענסי אגענטורן זענען געווען אנגעשלאסן אין די זוך אקציע, אריינגערעכנט וואלאונטירן פון ניו יארק, חברים ד'ראקלענד, מציל ארגענעזאציע, און הצלה עיר, וועלכע זענען ספעציעל געפארן קיין אריזאנע ארויסצוהעלפן מיט די זוך אקציע.
יעצט נאכמיטאג קומט אריין די שפרודלדיגע פרייליכע נייעס אז דאס קינד איז אפגעפונען געווארן אין א גוטע צושטאנד, מען האט אים געטראפן צווישן די געדעכטע ביימער אין די וואלד, און ער איז ב"ה וואך און מוטיג. ער ווערט אצינד אפגעפירט אין שפיטאל פאר אונטערזוכונגען, און די וואלאונטירן אויפן סצענע האבן זיך ארויסגעלאזט אין פייערדיגע טענץ צו דאנקן און לויבן דעם אויבערשטן, ווען גאנץ כלל ישראל פרייט זיך מיט בכל מקומות מושבותיהם.
