א גרויסארטיגע עצרת מחאה ווערט געפלאנט אויף קומענדיגע וואך דאנערשטאג פרשת שופטים, אין ליכט פון די גזירת גיוס בני הישיבות וואס הויערט אויף אחינו בני ישראל דרי ארץ הקודש, די גרויסע מחאה וועט פארקומען במעמד אלפי ישראל נעבן די גרויסע געביידעס אין מאנהעטן, וואו שלומי אמוני ישראל וועלן אויסשרייען דעם וויי געשריי פון אונזערע ברידער בארצינו הקדושה וואס ליידן צוזאם פון די ציוניסטישע מדינה ה"י.
מטעם די בית דין הגדול שבירושלים העדה החרדית איז ערשינען א מכתב קודש אין וואס זיי רופן דעם ציבור ארויסצוקומען לרחובה של עיר און מוחה זיין כדת של תורה, א קול מחאה וואס זאל געהערט ווערן מסוף העולם ועד סופו אפצוהאלטן די רשעים ימ"ש פון אויספירן זייערע בייזוויליגע פלענער. אזוי אויך איז ערשינען א מכתב קודש פון התאחדות הרבנים דארה"ב וקאנאדע, וואו זיי ברענגען ארויס דעם חוב קדוש צו מרעיש עולמות זיין און ארויסברענגען א קול מחאה קעגן די רשעות'דיגע ציונים ימ"ש מיט זייערע פרישע גזירות און טאקטיקן אריינצושלעפן היימישע אידן אין מיליטער.
ווי דערמאנט וועט די גרויסע מחאה ווערן אפגעהאלטן קומענדיגע וואך דאנערשטאג שופטים ב' אלול ברחובות העיר מאנהעטן במעמד אלפי ישראל, גענויע דעטאלן ווערן אצינד אויסגעארבעט דורך די עסקנים וועלכע האנדלען אצינד מיט די גרעסערע קהילות אין ניו יארק, וואס וועלן ווארשיינליך ארויסקומען מיט א פאראייניגטע שטימונג אפצושרייען די שרעקליכע גזירת הגיוס, אזוי ווי עס איז שוין געווען עטליכע מאל אין די פריערדיגע יארן ווי באקאנט.
