שטייענדיג געציילטע שעות איידער מען טרעט אריין אינעם גרויסן טאג, די יומא דהילולא קמייתא פון כ"ק אדמו"ר הרה"ק מראחמיסטריווקא זי"ע, ווערן שוין פארענדיגט די לעצטע הכנות צום גרויסן טאג אויפן בית החיים הר שלום אין מאנסי, וואו עס איז ערווארטעט א ריזן ציבור פון שווערע טויזענטער אידן צו פוקד זיין דעם ציון הק' בעצם יומא דהילולא קדישא, בהאי יומא דרעווא ערב ראש חודש אלול, להיפקד בדבר ישועה ורחמים און אויסצובעטן א גוט געבענטשט יאר.
ווי געמאלדן קומט היינט נאכט פאר די צענטראלע יארצייט טיש אינעם גרויסן בעלזא זאל אין בארא פארק אין שפיץ פון ממשיכי דרכו בקודש כ"ק האדמורי"ם שליט"א, און מארגן מאנטאג וועט פארקומען קלענערע מעמדים יארצייט טישן און מסיבות לחיים לכבוד היום.
די קינדער כ"ק האדמורי"ם שליט"א וועלן ארויפגיין צום ציון הק' יעדער באזונדער דורכאויס די טאג, נכדו הגדול כ"ק אדמו"ר מראחמיסטריווקא ס"וו שליט"א זיבן דרייסיג אינדערפרי, כ"ק אדמו"ר מראחמיסטריווקא מאנסי שליט"א צען דרייסיג, כ"ק אדמו"ר מראחמיסטריווקא וומס"ב שליט"א עלף דרייסיג, כ"ק אדמו"ר מראחמיסטריווקא שליט"א צוועלף דרייסיג, כ"ק אדמו"ר מראחמיסטריווקא לעיקוואד שליט"א איינס דרייסיג, כ"ק אדמו"ר מראחמיסטריווקא אוקוויין שליט"א צוויי דרייסיג, און כ"ק אדמו"ר מראחמיסטריווקא לינדען שליט"א דריי דרייסיג.
כ"ק אדמו"ר מוויזניץ שליט"א פון קייאמישע חתנו הגדול פונעם רבי'ן זצ"ל, וועט ארויפגיין צום ציון הק' היינט זיבן אזייגער פארנאכטס, אויפן וועג אריין קיין בארא פארק זיך משתתף צו זיין ביים צענטראלן יארצייט טיש.
די בארימטע רענטעסטיק פארטי רענטל פירמע איז אויפגענומען געווארן דורך די ראחמיסטריווקא קהילה און די חברא קדישא, צו אנפירן מיט די טעכנישע דעטאלן ארום דעם ציון הק', צושטעלן אלע באדערפענישן פאר די טויזענטער מתפללים ביים ציון הק', עטליכע שאטערס צו דאווענען, לערנען, צינדן ליכט, און צו טרינקען לחיים און זיך דערכאפן דאס הארץ לזכר נשמתו פונעם בעל ההילולא.
