וּבְכֵן יִתְקַדַּשׁ שִׁמְךָ ה' אֱלקֵינוּ עַל יִשְׂרָאֵל עַמֶּךָ וְעַל מְכוֹנָךְ וְהֵיכָלָךְ:
כלל ישראל אַלוועלטליך איינגעהילט אין הייליגן התרגשות צו הילולא קדישא פון ״תוספות יום טוב״ זי״ע; אידן איבער דער גאָרער וועלט הייבן זיך בקדושת התפלה
הילולא קדישא, דעם קומענדיגן מאָנטאָג תצא ו׳ אלול
לבבות ישראל שטורעמען מיט טיפע הרגשים זיך אויסצוגיסן די הערצער ביים ציון הקדוש ביומא דהילולא קדישא און מיטהאַלטן פלאם-פייערדיגן
״מעמד בקשת רחמים״ אין שפּיץ פון הגה״צ המשפיע רבי יוסף חיים גרינוואלד שליט״א
לקדושים אשר בארץ:
פילע נסיעות הייבן זיך פון ניו יארק און אייראפּע און ארה״ק פוקד זיין דעם ציון המצויינת אין קראקא; ועד הכנסת אורחים דקראקא פיבערט מיט די צוגרייטונגען צו אקאמאדירן די פוקדי הציון המצויינת פון די גאנצע וועלט וואס קומען צו פארן אויף די הילולא קדישא
כלל ישראל. — צענדליגער טויזנטער אידישע קינדער, אנשים נשים וטף, פון גלאָבאַלן כלל ישראל בכל קצוי תבל, זענען אין די יעצטיגע טעג איינגעהילט אין אַ פלאַם-פייער, אַן אש להבה, זיך צו הייבן בקדושת התפלה, לקראת די הילולא קדישא פונעם גאון ישראל וקדושו דער הייליגער תוספות יום טוב זי״ע, דער מחבר פון הייליגן ״מי שברך״ לכל מי ששומרים פּיהם ולשונם שלא לדבר בשעת התפלה.
דעם קומענדיגן מאנטאג תצא, ו׳ אלול, ווען עס געפאַלט אויס די הילולא קדישא פונעם צדיק יסוד העולם, עיר וקדיש מן שמיא, קוקט כלל ישראל אַרויס בעינים צופיות למרום מיט האָפענדע הערצער צו שעפּן ליכטיגע ישועות והשפּעות, בכוחו ובזכותו פונעם הייליגן תוספות יום טוב, באַגלייט מיט׳ן זכות פון אזויפיל אידן וואס הייבן זיך אין מורא מקדש, אָפּצוהיטן דעם כבוד בית ה׳, און פאָרזעצן די רעוואָלוציע ביי כלל ישראל, וואָס פאַרשפּרייט זיך ווי אַ העליש פייער בכל שכבות ישראל: ביים דאווענען רעדט מען בלויז צום בורא כל עולמים!!!
אין עיר הקודש ״קראָקאָ״ ערוואַרט מען צו אנטפאנגען הונדערטער אידן וועלכע קומען צו פאָרן מכל מקומות מושבותיהם, צו זיין אויף דער הילולא קדישא על האי מקום אדמת קודש, מה נורא המקום הזה, דער אויסגעווייקטער מקום קיבול תפלות וואו טויזנטער אידן ווערן הפלא׳דיג געהאָלפן מיט ישועות ורפואות ולמעלה מדרך הטבע, ובפרט ווען מ׳טוט זיך דערביי מקבל זיין הייליגע קבלות להתעלות בקדושת התפלה, וואס איז א סגולה בדוק ומנוסה להתברך בכל משאלות הלב לטובה.
אכשר דרא! דער כח התפלה פון כלל ישראל אויף די העכסטע ספערן!
ס׳ווייסט שוין היינט יעדער, ס׳איז אַ פאַקט און א פּרעכטיגער אומפאַרלייקנבאַרער מציאות, אַז אַ ״היסטאָרישע רעוואָלוציע״ שפּילט זיך אָפּ ביי כלל ישראל איבער די נושא פון ״קדושת התפלה״! כלל ישראל רעדט נישט מער ביים דאַווענען! דאָס איז דער קלאָרער פאַקט! מ׳רעדט נאר צום הייליגן באשעפער, מ׳פארשטייט די לעכטיגע השפעות טובות וואס קומט אראפ דורכ׳ן כח התפלה און מ׳טוט עס אויסניצן מיט׳ן ריכטיגן כח בעז״ה.
די גרעסטע קהלות קדושות, די גרעסטע חסידות׳ער, די גרעסטע ישיבות, די גרעסטע מוסדות, פון אַלע שיכטן און אַלע קרייזן, אין אַמעריקע, אייראָפּע און ארה״ק, בכל מקום ומקום אשר דבר המלך ודתו מגיע, איבעראַל איז געוואָרן איינגעפעדימט און פאַרשטאַרקט דער פעלזן-פעסטער כח פון ״קדושת התפלה״! גדולי ישראל שטייען בראש, זיי זענען מעורר, די גבאי הקהלות שטייען על המשמר! איכשר דרא!
בחסדי ה׳, זעט מען אַן אומגלויבליכע שינוי לטובה ב״ה, און כלל ישראל טוט דערמיט שטאָלצירן, מ׳קומט היינט אַריין אין די בתי מדרשים, דאָס קדושת ביהמ״ד לייכט און שיינט, ס׳שרייט אַרויס פון יעדן ווינקל כבוד ה׳, באין אומר ואין דברים בלי נשמע קולם, ״אין זה כי אם בית אלקים וזה שער השמים״!
ס׳איז קיין ספק נישט אַז די פּעולות אדירות חובקות זרועות עולם פון ״קרן תוספות יום טוב״ אויפצורודערן און אויפצו׳רעש׳ן כלל ישראל איבער קדושת התפלה, האָבן ב״ה סוקסעספול געברענגט דערצו אז: צענדליגער טויזנטער אידן פון איבער דער גאָרער וועלט, האָבן גענומען אויף זיך אפּצוהיטן קדושת התפלה און זיך הייבן ביים דאַווענען, און הונדערטער — און פילייכט טויזנטער — קהלות, בתי מדרשים, ישיבות תלמוד תורה׳ס, האָבן דורכגעפירט ״קבלה קאַמפּיינס״ און איינגעפעדימט די תקנה שלא לדבר בשעת התפלה כיתד בל תמוט, און דעם ״תוספות יום טוב׳ס מי שברך״ איז היינט געוואָרן אַ נחלת הכלל!
ועין בעין בישועת ה׳! ס׳איז באמת מבהיל על הרעיון, ווי די אויפוואַכונג ברענגט אַ קוואַל פון ישועות פאַר כלל ישראל! בעצם איז דאָס אַלץ געווען אָנגענומען אַלס די שטאַרקסטע ״סגולה״ בדוק ומנוסה, צו זען רפואות, שידוכים, פרנסה, הצלה מצרה וצוקה, אין זכות וואָס מ׳נעמט זיך אונטער נישט צו רעדן ביים דאַווענען און קריאת התורה, און בכלל זיין נזהר אין מורא מקדש!
טויזנטער מענטשן, אין אונזערע טעג, דערציילן הפלא׳דיגע עובדות, וואונדערליכע עפּיזאָדן ווי זיי זענען געהאָלפן געוואָרן אין יעדע זאַך וואָס זיי דאַרפן, מיט הימלישע פּאַסירונגען ממש, נאָך אַ שטיק צייט וואס זיי האבן זיך אונטערגענומען — און זיך געהאַלטן — צו די קבלות טובות להתרומם בקדושת התפלה.
דער קידוש שם שמים דערפון הילכט אָפּ מסוף העולם ועד סופו!
און אַצינד, שטייענדיג ערב דעם ״יום די הילולא קדישא פון הייליגן תוספות יום טוב זי״ע — וואָס געפאלט אויס דעם קומענדיגן מאנטאג פ׳ כי תצא, ו׳ אלול –— ווערט נתרבה ונתחזק דער אנשלוס אין די הייליגע קבלה, ״אין אַלע געגענטער״ און ביי ״אלע שיכטן און קרייזן״, ווייל אט דער הייליגער ענין איז נוגע יעדן איד, בכל מקום שהוא, אנשים נשים וטף!
דער הייליגער באַשעפער איז ״שומע תפלת כל פה״, און יעדעס אידיש קינד וואָס ווענדט זיך צום טאַטן אין הימל מיט אַ בקשה, מיט אַ הייסע אמת׳ע תפלה, הערט זיך דער רבוש״ע צו, און ווען מ׳צייגט דעם רבוש״ע אַ ריינע קבלה נישט צו רעדן בשעת התפלה, וועט מען אַלעס גוטס פּועל׳ן, אַ ישועה פרטית וכללית פאר כלל ישראל!
מאסיווע צוגרייטונגען אין קראָקאָ צום יומא דהילולא און ״מעמד בקשת רחמים״!
אין ווייטן קראקא, אשר שם חלקת מחוקק ספון, קומען יעצט פאָר די מאַסיווע פיבערהאפטיגע צוגרייטונגען דורכ׳ן ״ועד הכנסת אורחים דקראקא״ צום גרויסן הילולא קדישא, צו קענען אויפנעמען די מאַסן, ווי עס קומען צו פארן הונדערטער אידן מכל מקומות מושבותיהם, אין שפיץ פון הרבנים הגאונים הצדיקים שליט״א. עס קומען צו פארן גרויסע שיירות פון ניו יארק און פון ארצות אייראפּע. אידן ווילן אריינכאפּן זיך אויסבעטן ביים הייליגן צדיק, אין דעם מסוגל׳דיגן טאָג, ערב די הייליגע טעג!
לענגאויס די גאנצע 24 שעה ארום די הילולא קדישא, פון זונטאג אינדערפרי ביז מאנטאג נאכט, וועט אי״ה זיין אָפן דער בית החיים הישן, צוגעשטעלט מיט עלעקטערישע באלייכטונגען, ליכט, קוויטל פאפיר, און ״שטרי קבלה״.
מאנטאג בעצם יומא דהילולא קדישא, אום צוויי אזייגער מיטאָג, פּוילישער זייגער, וועט אי״ה פארקומען דער פייערדיגער מעמד בקשת רחמים, בראשות המגיד והמשפיע המפורסם הגה״צ רבי יוסף חיים גרינוואלד שליט״א, ווי עס וועט ווערן צוגעגרייט א מקום מוכשר פאר׳ן גאנצן ציבור צו קענען מיטהאלטן דעם פאָרכטיגן מעמד הנורא ״בקשת רחמים״ ביים ציון הקדוש פון הייליגן תוספות יום טוב זי״ע.
יעדער וויל מיטהאַלטן דעם מעמד הנורא, וואו דער געהויבענער מגיד שליט״א וועט אויפפלאַמען די הערצער איבער׳ן גודל קדושת הזמן, און דאָרט וועט מען אי״ה אַראָפּשטעלן די קוויטלעך און איינרייסן ברחמים ובחנונים, פאר זיך און פאר גאנץ כלל ישראל - - הי׳ עם פיפיות שלוחי עמך בית ישראל! עס וועט זיין צוגעשטעלט א הוקאפּ פאר אידן פון איבער דער וועלט צו קענען מיטהאלטן, און דערביי מתפּלל זיין בארצות פזוריהם, זיך מקשר זיין מיט די תפלות ביומא דהילולא. אויספירליכע פרטים וועלן נאכפאלגן אין די ספּעציעלע מודעות.
באזונדער וועט ווערן צוגעגרייט א מקום מיוחד א מרפסת כהנים צו קענען שטיין און מיטהאַלטן די שעות של בקשת רחמים ועת רצון, און די זעלבע וועט זיין א מקום מיוחד פאר די נשים צדקניות צו קענען אויך זיך אויסבעטן דערביי און נתעורר ווערן צו אויס׳פועל׳ן ישועות ורפואות אין זכות פון הייליגן תוספות יום טוב זי״ע, אין דעם מסוגל׳דיגן טאג, וואס טויזנטער אידן זענען שוין געהאלפן געווארן ממש למעלה מדרך הטבע!
במשך די ימי ההיצולא וועלן זיין כסדר'דיגע מנינים אינעם ״רמ"א שול״ און ברייטע סעודות מיט קאווע און לייכטע איבערבייס וועט זיין צוגעשטעלט במשך די 24 שעה פון די הילולא אינעם בנין הכנסת אורחים ״אהל אברהם״ וואס ווערט אנגעפירט מיט גרויס געטריישאפט דורך הר״ר אברהם זאלדאן שליט״א, און אַזוי אויך וועט זיין דארט צוגעשטעלט אלע צרכי ציבור בכבוד הראוי.
אין דער זעלבער צייט וועלן די ימי ההילולא קדישא ווערן אויסגעניצט דורך גדולי הרבנים ומנהיגי ישראל מעורר צו זיין בני קהלותיהם איבער קדושת התפלה, און די גבאים ושומרי משמרת הקודש פון די קהלות הקודש בכל מקום שהם, צו מאַכן דעם ״מי שברך״ און שטיין על משמרת קדושת התפלה ביתר שאת וביתר עז, אַזוי אויך וועלן פאָרקומען מסיבות לחיים לאחר התפלה, וואו אידישע קינדער וועלן זיך וואונטשן ״זכותו יגן עלינו״ און זיך מחזק זיין אין דעם הייליגן ענין פון קדושת התפלה.
שטייט אַצינד כלל ישראל, אין דער יעצטיגער פאָרכטיגער תקופה, ווען מ׳איז אנגעוויזן אויף אזויפיל רחמי שמים מרובים בארץ ובגולה, אַז מיט די הייליגע זכותים פון דעם בעל ההילולא קדישא, און מיט די זכותים אדירים פון טויזנטער אידן וועלכע זענען זיך מקבל בקדושת התפלה, זאָל דאָס שוין אי״ה ברענגען די ענדגילטיגע ישועה, כלל ישראל זאָל אויפגעראָכטן ווערן! דאס זיך הייבן אין קדושת התפלה אין די ימים המסוגלים לתשובה ולתיקון המעשים, וואס וועט ברענגען אַ ״ישועת קוואל״ פאר אידישע קינדער בכל ארציהם, ביז מיר וועלן שוין זוכה זיין צו דער גאולה שלימה, בב״א.
כלל ישראל גרייט זיך צו פּועל׳ן ישועות ביים הייליגן תוספות יום טוב, קומענדיגן ו׳ אלול הבעל״ט ביי די הילולא קדישא!
