זעקס שטאקעדיגע געביידע אויף העריסאן פולקאָם אַרויפגעצויגן, בוי ארבעט גייט ווייטער אן צו פארענדיגן דעם בנין ביז חנוכה הבעל"ט
בחורי סאַטמאַר וומסב"ג גרייטן זיך צו טרעפן זייער מקום מנוחה רחבת ידים ווען 3 ישיבות קטנות וועלן באַנייען די פרעכטיגע שטאָקן – אין צוגאב צו א פרישע בית המדרש דקהל יטב לב
ברכה המשולשת בתורה:
פיר העכערע שטאקן וועט אקאמאדירן הונדערטער תלמידים פון די 'ממלכת התורה' אימפעריע, פרעכטיג און רחבות'דיג אהערגעשטעלט, פאר יעדע ישיבה באזונדער
שם תהא תפלה
נייער הערליכער ביהמ"ד דקהל יטב לב ווערט אהערגעשטעלט אין די ערשטע צוויי שטאק צו סערווירן אלס שפרודלדיגע תורה ותפלה צענטער פאר'ן גאנצן געגנט ארום
סוף וקץ לכל גלותינו:
בנין החדש וועט שליסן שווערע לאגע פון כסדר'דיגע וואנדערונגען אין געדינגענע לאקאציעס, וואס האט אריינגעצויגן אין מיליאנען חובות פון רענט, רענאוואציע און מופן קאסטן, באגלייט מיט אומגעהויערע עגמ"נ און אומסטאביליטעט
אשרי העם שככה ל"ו:
געמיינזאמע "תבנה ותכונן" פלאקער ביים גאנצן ציבור, צו העלפן ערגענצן דעם בנין, און פארווירקליכן די לעכצנדע 'לבוא אל המנוחה ואל הנחלה' פאר די ישיבות קטנות
שוואונג פונעם "תבנה ותכונן" קאמפיין ווערט געלאזט אין גאנג; יעדער קויפט א זכות שותפות אינעם בנין מיט'ן סכום פון $3,600 – יחד לבנות ולגמור!
מיט אויסטערלישע שמחה ווערט נאכגעפאלגט ביי אלפי חסידי סאטמאר תושבי וויליאמסבורג די אומגלויבליכע דערגרייכונג, ווען עס האלט שוין נאנט צום גמר פונעם בנין אדיר ומפואר "בנין הישיבות – בנין בערקאוויטש", וואס וועט איינמאל פאר אלעמאל אוועקשטעלן א פערמאנענטע אכסניא של תורה פאר די בארימטע "ממלכת התורה" דסאטמאר.
די ישיבות אין גלות
די זעקס-פאכיגע אימפעריע פון די ישיבות קטנות איז די שפיגעלע און שטאלץ פון סאטמאר אין שטאט וויליאמסבורג. אלע קוקן ארויס אויף זייער הצלחה, און מ'טוט קוועלן פאר פרייד אויף די בליענדע וואוקס און הערליכע סוקסעס פון יעדע ישיבה באזונדער, וואס איז אזוי וואונדערליך מצליח מיט'ן ארויסגעבן זיסע פרוכטבארע פירות, תלמידים הגונים למאות ואלפים, לתפארת עדת סאטמאר.
ודא עקא, עס האט אלעמאל א ציפ געטאן ביים הארצן ווי די ישיבות טוען סיסטעמאטיש וואנדערן און זיך וואלגערן ממקום למקום. זעלטן ווען דער וואנדער-שטעקן איז אראפ פון האנט. ווען מ'האט זיך שוין ענדליך פלאצירט ערגעץ, האט נישט לאנג געדויערט געוואר צו ווערן אז דאס איז נאך אלץ נישט דער 'נחלה ומנוחה' אויף וואס מ'לעכצט אזוי ארויס.
עס איז ביטער שווער געווען די לאגע, יעדע קלעטערונג איז געווען א מיטמאכנדע אפקומעניש פאר זיך. הן פאר די בחורים און מרביצי תורה, וועלכע האבן פראקטיצירט מסירת נפש פאר די הייליגע תורה, די התמדה האט קיינמאל נישט נאכגעלאזט, מ'איז אויסנאם הערליך געשטיגן במעלות התורה ויראה אונטער אלע שווערע אומשטענדן פון גולה אחר גולה.
און הן פאר די הנהלת גשמי, וואס האט געשלעפט א ביטער שווערע פינאנציעלע לאסט און מנוחה'לאזע קאפ-וויי פון נישטערן און גריבלען נאך פרישע לאקאציעס און רוטינליך אריינגיסן שווערע מיליאנען פאר רענט און רענאוואציעס.
וויפיל מ'האט פרובירט און געפיבערט אויף קעסל-און-כלים צו קענען האבן קווארטירט די ישיבות אין קביעות'דיגע אכסניות של תורה, און קענען אפאטעמען פון די וואגלענישן, איז מן השמים באשערט געווען ווייטער צו גלות-ליידן, ווען אינצווישן קומט צו נאך א ישיבה, און דערנאך נאך א ישיבה, די ממלכת צעבליעט זיך, און דאס באדייט, פרישע ישיבות אין גלות אריין...
הישיבות בבנינה!
ויעבור הרנה במחנה! ווי שמחה'דיג האבן גערוישט די געפילן ביים ציבור, הערנדיג די בשורה מרנינה, אז די ממלכת האט געקויפט אן אייגענעם בנין! נישט נאר א בנין פאר איין ישיבה, און נישט נאר פאר צוויי, נאר א ריזן געביידע פאר א פערמאנענטע אכסניא פאר'ן "ממלכת התורה"..
די הנהלה איז דאן אריינגעשפרינגען אין א מעגא "צוואנציג מיליאן דאלאר" אונטערנעמונג, אפקויפענדיג דעם בנין הגדול אויף העריסאן קאר. היוז סטריט, וואו עס ווערט אויפגעבויט א פראכטפולער "בנין הישיבות – בנין בערקאוויטש".
אינעם בנין החדש וועלן קווארטירט ווערן דריי ישיבות, יעדע ישיבה אויף א באזונדערע שטאק, מיט באזונדערע אריינגענג, און באזונדערע אויסגערישטע היכלי התורה און באקוועמע צוגעהערן, ווי א בנין פאר זיך. עס וועט בעז"ה ברענגען א היסטארישע דערלייכטערונג פאר די סאטמארע ישיבות קטנות אין וויליאמסבורג, צום ערשטן מאל זייט איר גרינדונג.
זאת קומתך: בתוככי הבנין
דער בנין שטייט מיט פראכט ביים ווינקל פון העריסאן עוועניו און היוז סטריט, און איז געווארן אפגעקויפט פאר אן אסטראנאמישע סומע, שוין מיט אן ארויפגעצויגענע סטרוקטור פאר א ביהמ"ד, דאס רעכנט אריין א בעיסמענט-שטאק, א ביהמ"ד שטאק, און א ווייבער שול.
יעצט, אז די 'ממלכת' האט אפגעקויפט דעם בנין, ווערט דער עקזיסטירנדער סטרוקטור פארוואנדלט אין פיר-שטאק, דורכ'ן צעשניידן דעם ביהמ"ד שטאק אין צוויי, און באזונדער ווערט דערויף ארויפגעבויט צוויי פרישע שטאק.
בסך הכל וועט דער בנין באשטיין פון זעקס שטאק. דער הויפט טייל פונעם בנין, דהיינו די העכערע פיר שטאקן, וועלן זיין פאר די 3 ישיבות, און די אונטערשטע צוויי שטאק ווערט דעזיגנירט פאר א נייעם ביהמ"ד מפואר דקהל יטב לב.
עס וועלן זיך אריינציען אהין די ישיבות א) "נזר התורה", ב) "אהבת התורה", ג) "חכמת התורה".
מיט דעם וועט ווערן אויפגעלעזט די סעריע געדינגענע לאקאציעס איבער די שטאט, וואו די דריי דערמאנטע ישיבות זענען געווען לאקאליזירט, אונטער שווערע אומשטענדן און גאר טייערע קאסטן פון רענט.
יעדע ישיבה אינעם בנין החדש ווערט קווארטירט אויף אן עקסטערע שטאק, ביהמ"ד, כיתות, עס-זאל, מיט אלע צוגעהערן און איינריכטונגען כראוי וכיאות.
יעדע ישיבה וועט אריינגיין פון א באזונדערע אריינגאנג פון די גאס. אריינגאנג 1 ביי 'העריסאן'; אריינגאנג 2 ביי היוז; אריינגאנג 3 ביי די אנדערע זייט 'העריסאן'.
כולו לה': ביהמ"ד החדש דקהל יטב לב אויף ערשטע שטאקן
אויף די ערשטע צוויי שטאקן פונעם בנין ווערט אויפגעבויט מיט פולע פראכט און גרויסקייט, א נייער הערליכער ביהמ"ד דקהל יטב לב, וואס אנטשפרעכט צו זיין א שפרודלדיגע תורה ותפלה צענטער פאר די הונדערטער אנ"ש תושבים פונעם גאנצן געגנט ארום.
אינעם בעיסמענט ווערט געבויט א הערליכע מקוה מהודרת, פיר חדרי תפלה, און נאך באקוועמע צוגעהערן. אויפ'ן ערשטן שטאק ווערט געבויט א היכל ביהמ"ד מפואר, מיט הונדערטער זיץ-פלעצער.
הבית בהבנתו: מארשירנדע בוי-פראגרעס
די בוי-ארבעט לויפט העפטיג פאראויס אויף אלע פראנטן. נאכ'ן קאמפלעט פארטיגן מיט'ן ארויפציען די צוויי נייע שטאקן, ווען עס פינקלט שוין מיט'ן פולן שיין די גיגאנטישע זיבן-שטאקיגע סטרוקטור, האט מען זיך גענומען מיט די אינערליכע אינסטאלאציעס, וואס מארשירט פאראויס אין גאלאפירנדע שוואונג.
מ'האט שוין פארענדיגט אינסטאלירן די 'פלאמבינג', 'עירקאנדישאן', און אנדערע צענטראלע איינריכטונגען, און מ'האט דערויף אנגעהויבן לייגן 'שיטראק', און דערויף פאלגט נאך דאס אינסטאלירן 'טיילס', א.א.וו. צו ערגענצן דעם בנין בכליל תפארת.
מען ארבעט רונדע די זייגער אין געיעג צו האבן דעם בנין פארטיג מיט'ן מולטי צוואנציג-מיליאן דאלאר פראיעקט אויף דעם קומענדיגן חנוכה תשפ"ה, בשעטומ"צ, ווען עס וועט זיך אזוי געגאסן זינגען ביי די חנוכה-ליכט: 'אז אגמור בשיר מזמור חנוכת' בעז"ה.
יחד לגמור!
כדי דאס זאל טאקע קענען פאסירן פאדערט זיך די מיטשפאן פון כל הקהל הקודש, יעדער פאלגט נאך מיט שפאנונג און עקסטאזפולע הרגשים דעם מעכטיגן פראיעקט פון הרחבת גבולי הקדושה, וואס פעלט זיך אזוי קריטיש וויכטיג אויס למען עתיד דורותינו, און צוזאמען מיט דעם טוט יעדער זיך אנגארטלען מיט א פלאקערדיגע גייסט פון צולייגן א הארציגע פלייצע, נעמען א זכות שותפות אינעם בנין החדש, אומשאצבארע זכותים וואס וועלן באגלייטן אויף שטענדיג.
אין לויף פון די יעצטיגע וואכן איז געלאזט געווארן אין גאנג א מאסיווע איינמאליגע "תבנה ותכונן" קאמפיין, אויפצוטרייבן די ריזיגע פאנדן וואס פאדערט זיך קריטיש צו קענען גומר זיין דעם בנין כליל בהדרו. די ווארעמקייט וואס שפירט זיך ביים ציבור דערפאר טוט נישט אנטוישן די שלוחי קודש, וועלכע גייען ארום אפנעמען די תרומות הציבור, די באשטימטע גלענצענדע זכות שותפות פון $3,600, וואס מ'שפירט פאר א זכי' און אלס גאלדענע איינמאליגע געלעגנהייט, צו העלפן בויען תורה ויראה אויף אזא מאסשטאבליכן פארנעם.
דער קאמפיין איז אין העפטיגע שוואונג, די עסקנים פרובירן אנצוקומען צו יעדן יחיד, און קענען פאר יעדן געבן די מעגליכקייט ארויסצונעמען זיין חלק און השתתפות אין די געמיינזאמע מאביליזאציע פון די גאנצע קהלא קדישא, אינאיינעם צו בויען, אינאיינעם צו פארטיגן, און אינאיינעם שעפן נחת און געניסן א קוועלנדע קורת רוח ביים זען דעם בנין על תלה בנוי', דער קול תורה ארויסדונדערן דערפון, לשמחתינו ולשמחת פדות בנינו.
