חסידי ראחמיסטריווקא גרייטן זיך מיטצולעבן א זעלטענע געהויבענע שבת, בשבת אחים גם יחד ווען פינף ברידער כ"ק מרנן האדמורי"ם שליט"א וועלן פירן אינאיינעם, לרגל די שמחת השבע ברכות במעונו פון כ"ק אדמו"ר מראחמיסטריווקא לינדען שליט"א בנישואי בתו הכלה למזל טוב, מיטן חתן א אייניקל פון כ"ק אדמו"ר מנדבורנא שליט"א.
די חתונה איז געפראוועט געווארן דעם דינסטאג אין בארא פארק במקהלות עם רב חסידים ואנשי מעשה, און אצינד גרייט מען זיך צום גרויסן שבת של שמחה וואס וועט געפראוועט ווערן בבית מדרשו פונעם אומפארגעסליכן רעיא מהימנא דער גרויסער זיידע כ"ק אדמו"ר הרה"ק מראחמיסטריווקא זי"ע.
לכבוד שבת וועלן קומען צו פארן האחים האדמורי"ם שליט"א ממקומות מושבותיהם, כ"ק אדמו"ר מראחמיסטריווקא מאנסי שליט"א, כ"ק אדמו"ר מראחמיסטריווקא וויליאמסבורג שליט"א, כ"ק אדמו"ר מראחמיסטריווקא לינדען שליט"א אבי הכלה, און כ"ק אדמו"ר מראחמיסטריווקא אוקוויין שליט"א. אלע וועלן פראווענען אינאיינעם מיטן עלטערן ברודער כ"ק אדמו"ר מראחמיסטריווקא שליט"א.
די גאנצע שבת וועט געפראוועט ווערן אין ביהמ"ד הגדול ראחמיסטריווקא אויף די פינף און פערציגסטע סטריט אין בארא פארק, און די עסקנים שטעלן אויס די ביהמ"ד צו קענען אקאמאדירן דעם ריזן ציבור וואס איז ערווארטעט אנטייל צו נעמען ביי די תפילות און טישן כשהמלכים במסיבם, בשבת אחים גם יחד.
כ"ק אדמו"ר מראחמיסטריווקא לעיקוואד שליט"א וועט פארבלייבן אויף שבת אין לעיקוואד, נאך וואס ער האט שוין געפראוועט פארלאפענע וואך שבת אין בארא פארק לרגל די שמחת השבע ברכות פון א אייניקל, אזוי אויך וועט נישט אנטייל נעמען דער פלומעניק כ"ק אדמו"ר מראחמיסטריווקא שליט"א פון ספרינג וואלי, וועלכער איז צוגאסט די טעג אין ארץ ישראל לרגל די שמחת החתונה בבית אחיו, און וועט פראווענען א גרויסע שבת אין שטאט בית שמש במקהלות עם רב.
