היינט צופרי איז נפטר געווארן אין וויליאמסבורג הרב החסיד ר' שלום יוסף גאטליעב ע"ה, לאנגיעריגער אייגענטומער פון די באקאנטע גאטליעב'ס רעסטוראנט אויף ראבלינג סטריט ביים ווינקל פון דיוויזשאן עוועניו.
ר' שלום יוסף איז געווען א זון פון הרב החסיד ר' שלמה זלקא גאטליעב ע"ה, וועלכער האט געעפנט די נאסטאלגישע גאטליעבס רעסטוראנט מיט העכער פופציג יאר צוריק, ר' שלום יוסף האט עס ווייטער געפירט, און היינט ווערט עס געפירט דורך זיין זון ר' מנשה גאטליעב הי"ו.
ער איז געווען מחשובי חסידי סאטמאר אין וויליאמסבורג, און פאר לאנגע יארן א מתפלל קבוע אין דעעשער בית המדרש אויף ראסס סטריט, וואו ער איז געווען מחשובי ופני העדה. מיט עטליכע טעג צוריק איז ער געווארן שפיטאליזירט צוליב א לונגען אנטצינדונג, און היינט צופרי איז ער נפטר געווארן לחיי העולם הבא אין עלטער פון 75 יאר, איבערלאזנדיג א שיינעם דור בליעה"ר. די לוויה וועט פארקומען היינט נאכמיטאג פארנט פון ביהמ"ד דעעש.
זיין פטירה קומט אין א טאג וואס די היימישע אידנטום אין וויליאמסבורג האט געהאט גרויסע פלענער, דער געוועזענער פרעזידענט און יעצטיגער קאנדידאט דאנאלד טראמפ האט געפלאנט א באזוך אין די היימישע וויליאמסבורג, מיט א קורצע אפשטעל אין די נאסטאלגישע גאטליעב'ס רעסטוראנט. העפטיגע הכנות איז שוין געמאכט געווארן אין די לעצטע פאר טעג מיט מערערע איינריכטונגען און זיכערהייט מוסנאמען, אבער אצינד אז דער בעל הבית פון די געשעפט איז נפטר געווארן, און על פי הלכה דארף די געשעפט זיין פארשלאסן היינט, איז אפגערופן געווארן די באזוך פון פרעזידענט טראמפ אין וויליאמסבורג.
