א ספעציעלע צערעמאניע איז פארגעקומען די וואך אין אנטווערפן, ווען עס איז צום ערשטן מאל געגעבן געווארן א נאמען פון א גאס נאך א אידישער עסקן וועלכער האט אסאך געלייסטעט לטובת די היימישע ציבור אין אנטווערפן, הרה"ג ר' אהרן כהן ז"ל רב פון ביהמ"ד מוריה, מגדולי חסידי בעלזא.
ר' אהרן איז נפטר געווארן יונגערהייט מיט עטליכע יאר צוריק, ער איז געווען א זון פון הרה"ג ר' ירמי' כהן שליט"א פאריזער רב, און פאר לענגערע יארן געווען פון די חשובע שתדלנים אינערהאלב די חסידישע געמיינדע אין אנטווערפן, אסאך אויפגעטון אין די פאליטישע קארידארן, אוועקגעשטעלט ארגענעזאציעס און אנערקענונג פאר אידישע עסקנים, און נאך פארשידענע וויכטיגע אנגעלעגנהייטן וואס איז אים צו פארדאנקען.
די גאס וואו עס געפונט זיך די בניני הקהילה והמוסדות דחסידי בעלזא, הארט נעבן די צענטראלע באן סטאנציע, האט אצינד באקומען די נייע נאמען "ראבין כהן פלעין" נאך הרב כהן ז"ל, מיט די פולסטע שטיצע פון די לאקאלע רעגירונגס באאמטע. ביי די צערעמאניע וואס איז אפגעהאלטן געווארן דארט אויפן פלאץ, האבן זיך באטייליגט מערערע עסקנים און קרובי המשפחה, די פאליציי הויפט פון אנטווערפן און דער לאקאלער מעיאר, וועלכער האט אויך אויפגעטרעטן מיט ווערטער אין עהרע פון ר' אהרן ז"ל.
אין נאמען פון די משפחה האט אויפגעטרעטן הרב ר' משה מונד הי"ו, און דער שטאטישער עסקן ר' יעקב קאניג הי"ו האט אנגעפירט די מעמד.
