קאנגרעסמאן מארק מאלינערא וועלכער פארטרעט סאליווען קאונטי, וואס רעכנט אריין עטליכע היימישע ישובים אין די קעטסקילס, האט היינט אפגעשטאט א באזוך אין קרית וויזניץ קייאמישע לעיק, וואו ער האט זיך געטראפן מיט היימישע עסקנים און פארשטייער פון די חרדישע געגנטער אין די קעטסקילס.
דורכאויס די באזוך איז ער ארומגעוויזן געווארן דורך די עסקנים אין די בניני הקהילה והמוסדות, און באגריסט די קינדערלעך אין חדר. א ספעציעלע זיצונג איז פארגעקומען אין איינער פון די שטיבלעך אין בית המדרש וואו עס זענען געווען אנוועזנד די עסקנים פון די וויזניצע שטעטל, די עסקנים פון די היימישע ישוב אין מאנטיסעלא, די עסקנים פון די ברסלב'ע ישוב אין ליבערטי, די עסקנים פון קרית יטב לב אין בלומינגבורג, און די עסקנים פון חב"ד אוו ראק היל.
דערנאך איז ער אריין אויף א באזוך צו כ"ק אדמו"ר מוויזניץ שליט"א פון קייאמישע, וואו עס איז ארומגעשמועסט געווארן פארשידענע ענינים העומדים על הפרק, און דער רבי האט אים ווארעם געוואונטשן ער זאל זען הצלחה און סייעתא דשמיא.
