דאס יהדות הגולה גרייט זיך צו אנטפאנגען בכבוד והתרוממות דעם חשובן גאסט פון ארץ ישראל, מרן הגאון הגדול רבי משה הלל הירש שליט"א ראש ישיבת סלאבאדקע, מזקני ראשי הישיבות וממנהיגי הדור בארץ הקודש, וועלכער קומט צו פארן קיין אמעריקע בטירחא דגופא ובטירחא רבא, אויף א לענגערע באזוך פון צוויי וואכן למען החזקת תורה ולומדיה.
די געהויבענע נסיעה פונעם ראש ישיבה איז געצילט אויפצוטרייבן גרויסע סכומים לטובת די סלאבאדקע ישיבה אין בני ברק, די ממלכת התורה וואס געבט ארויס טויזענטער תלמידים יאר יערליך בתורה והוראה, די תורה פעסטונג וואו טויזענטער בני תורה אינגעלייט און בחורים זענען זיך ממית באהלה של תורה יומם ולילה, און פארמאגט א שטארקע פינאנציעלע באזע בערי הגולה.
שוין עטליכע מאל וואס יהדות ניו יארק און ניו דזשערזי האט געהאט די זכיה צו מקבל זיין פני הדרת כבודו פונעם ראש ישיבה, און אצינד גרייט מען זיך ווידערמאל אויף דעם היסטארישן מאמענט ווען מ'וועט האבן די זכיה ליהנות מזיו אורו הבהיר און נהנה זיין עצה ותושיה, אין ראם פון די לענגערע באזוך בקרב תלמידיו מעריציו ושומעי לקחו.
די קומענדיגע וואך מיטוואך פרשת חיי שרה וועט דער ראש ישיבה לאנדן בשערי ניו יארק, דורכאויס די ימי הנסיעה וועט זיך דער ראש ישיבה אויפהאלטן אין מערערע אידישע שטעט און געגנטער, אריינגערעכנט מאנסי, לעיקוואד, בארא פארק, און נאך פלעצער אשר דבר המלך ודתו מגיע.
די הויכפונקט וועט זיין א היסטארישע שבת וואס וועט געפראוועט ווערן אויף א ערשטמאליגע פארנעם במקהלות עם רב אין שפיץ פונעם ראש הישיבה, מיט די באטייליגונג פון פילצאליגע תלמידים ומעריצים, עס וועט פארקומען אינעם ריזן מלון רעזארט אין פלארהעם פארק אין ניו דזשערזי, אונטערן נאמען "שבת בהיכלא", נאכגעפאלגט מיט א רייכע עלעגאנטע דינער לטובת החזקת הישיבה.
