נעכטן זונטאג איז פארגעקומען א באשיידענע מעמד הנחת אבן הפינה אין שיכון וויזניץ מאנסי, פאר די נייע פליגל וואס ווערט צוגעבויעט צום עקזיסטירנדן געביידע פון די מיידל שולע "בנין איינהארן" אויף 22 עישעל לעין, די מעמד איז פארגעקומען מיט די באטייליגונג פון א ענגע צאל נגידים בעם תומכי המוסדות.
די גרויסע געביידע וואס איז געבויעט געווארן דורך הנגיד ר' יחזקאל אביגדור איינהארן הי"ו, געפונט זיך הארט נעבן די אלטע בנין פון ישיבת וויזניץ אויף 20 עישעל לעין, וואס ווערט אצינד באנוצט דורך די אינגערע קלאסן פון די מיידל שולע. אצינד גרייט מען זיך אויפצובויען די רעכטע טייל פון די געביידע, וואס איז שוין פלאנירט געווארן מיט עטליכע יאר צוריק ווען מ'האט אויפגעבויעט די לינקע טייל פונעם בנין.
די מעמד איז פארגעקומען קאמבאנירט מיט די שמחת השבע ברכות פון א אייניקל ביי כ"ק אדמו"ר מוויזניץ שליט"א פון מאנסי, צוערשט איז מען ארויס אינדרויסן נעבן די עקזיסטירנדע בנין וואו מען גרייט זיך בקרוב אנצוהייבן מיט די בוי ארבעט, נאכן זינגען ווארעמע ניגונים האט דער וויזניצער רבי געגאסן דעם אבן הפינה, און דערנאך מכבד געווען די נדיבים בעם בוני הבנין. דאן איז פארגעקומען די שמחת השבע ברכות אין זאל פון די ערשטע טייל בנין, מיט א ענגע סוויטע געלאדענטע געסט נדיבים בעם תומכי המוסדות.
