א שרעקליכע טראגעדיע האט פאסירט היינט פארטאגס אין מאראקא, ווען א קאר מיט פינף היימישע אידן פון ארץ ישראל האט פארלוירן קאנטראל און זיך איבערגעדרייט, אלע פינף זענען ליידער טראגיש אומגעקומען אויפן פלאץ רח"ל.
די פינף אידן זענען ברסלב'ער חסידים פון עיר הקודש צפת, הרב נתן שפירא ע"ה זיבן און דרייסיג יאר אלט, וועלכער לאזט איבער עטליכע יתומים אין שטוב, הרב שמעון תפילינסקי ע"ה דריי און דרייסיג יאר אלט, וועלכער לאזט אויך איבער עטליכע יתומים אין שטוב. הב' יוסף חיים תפילינסקי ע"ה צוואנציג יאר אלט, הב' משה גאלאנט ע"ה אכצן יאר אלט, און הב' ישראל מאיר שאשא ע"ה פינף און צוואנציג יאר אלט.
די פינף ברסלבער חסידים זענען געפארן אינאיינעם מיט א גרעסערע קבוצה צו פוקד זיין די מקומות הקדושים און קברי צדיקים אין מאראקא, נעכטן ביינאכט זענען די פינף ארויסגעפארן מיט א קאר צו מתפלל זיין ביי א ציון פון א צדיק אין א ווייטע געגנט, און זייענדיג נעבן די שטאט ארזאזאט זענען זיי געווען פארמישט אין א שרעקליכע עקסידענט וואס האט געקאסט דאס לעבן פון אלע רייזנדע, לויט די באריכטן האט די קאר זיך איבערגעדרייט עטליכע מאל, און זיי קריטיש פארוואונדעט אויפן פלאץ.
לאקאלע עסקנים האבן זיך באלד פארבינדן מיט עסקנים פון ארץ ישראל און זק"א, וועלכע ארבעטן האנט ביי האנט צו פארזיכערן כבוד המת און צוריקברענגען די נפטרים קיין ארץ ישראל לקבורה. מאמענטאל געפונען זיי זיך אין א לאקאלע שפיטאל אין קאזאבלאנקא, און מען האפט וואס פריער צו מסדר זיין אלע נויטיגע דעטאלן על צד היותר טוב.
שנשמע ונתבשר בשורות טובות.
