אין די יעצטיגע טעג גרייט מען זיך פאר א היסטארישע מאמענט ביי חסידי ברסלב אין מאנסי, ווען די נאסטאלגישע שוהל "ביהמ"ד ברכת הנחל דחסידי ברסלב" וואס געפונט זיך אויף מעין סטריט אין צענטער פון שטאט, וועט ווערן אראפגעווארפן, סותר על מנת לבנות, ווען מען גרייט זיך אויפצובויען א שפאגל נייע רחבות'דיגע בנין וואס וועט דינען אלס גרויסע בית המדרש פאר די הונדערטער חסידים תושבי העיר.
די בית המדרש דינט אלס אכסניא של תורה פאר די ברסלבע חסידים שוין העכער פערציג יאר, זינט תשמ"ג ווען עס איז באנייעט געווארן אין א מזל'דיגע שעה. די קהילה אבער איז שוין געגרינדעט געווארן צען יאר פריער ווען א קבוצה חסידים האבן זיך צוזאמגענומען צו אפרעכטן די תפילות און מסיבות מרעים אויפן ברסלבער שטייגער.
די בית המדרש טראגט א פארצייטישע בילד פון אמאל, א אלטע שטיבל ווי אין דער אלטער היים, אבער אז די ציבור וואקסט נאכאנאנד בליעה"ר זעהט זיך אן די שטארקע געברויך אויפצובויען א פולשטענדיגע גרויסע בנין וואס זאל דינען אלס אכסניא של תורה תפילה ועבודה פאר אלע מתפללים קבועים און חסידי ברסלב וואס פארמערן זיך כסדר.
לויט די פלענער וועט מען שוין אראפווארפן די אלטע געביידע אין די נאנטע טעג, און די קהילה וועט דערווייל זיין פלאצירט אין א געביידע פון מוסדות וויזניץ אויף עליאן ראוד, דארט וואו עס פלעגט אמאל זיין די בית המדרש תפארת גדלי'. און מיטן אויבערשטנס הילף וועט מען ביז א קורצע תקופה זיך קענען אריינציען אין די נייע פראכטפולע רחבות'דיגע געביידע לשם ולתפארת.
