נאכפאלגענדיג די שרעקליכע שריפה וואס האט פאסירט ביים בית המדרש דקהל עדת ישראל אין מעלבארן אסטראליע, ווען בייזוויליגע פארברעכער האבן אונטערגעצינדן די שוהל, און האט אנגעברענגט רח"ל א אומגעהויערע שאדן פאר די חרדישע קהילה אין שטאט, גרייט מען זיך אצינד צום מעמד בקשת מחילה פון די ספרי קודש און תשמישי קדושה וואס וועט פארקומען מארגן דינסטאג ארטיגע צייט.
איבער א וואך צייט נאך די שרעקליכע פאסירונג, זענען די עסקני הקהילה אריינגעלאזט געווארן נעכטן זונטאג צום פארברענטן געביידע, ארויסצונעמען די ספרי קודש און תשמישי קדושה וואס זענען ליידער פארברענט געווארן, מיט ספעציעלע שוץ קליידער האבן די לאקאלע אויטאריטעטן געגעבן ערלויבעניש פאר די עסקנים אריינצוגיין אין די פארברענטע געביידע, און פאר לאנגע שעות נאכאנאנד האט מען אלעס צוזאמגענומען ווי עס פאסט, און עס צוגעגרייט צו קענען גונז זיין כדת וכדין.
על פי הוראתו פונעם רב הקהילה הגה"צ ר' שלמה קאהן שליט"א גאב"ד מעלבארן, איז באשטימט געווארן אויף מארגן דינסטאג פארנאכטס א מעמד בקשת מחילה, וואו די חברי הקהילה וועלן זיך צוזאמקומען פארנט פון בית המדרש און בעטן מחילה פון די ספרי קודש און די תשמישי קדושה, עס קומט אויס לויט די ניו יארקער זייגער שוין היינט מאנטאג שפעט ביינאכט.
