אידישע קינדער איבער די גאנצע וועלט זענען אויפגעשוידערט פון די שענדליכע אקט פון מדינת ישראל געזעצגעבער, וואס האבן אנגעהויבן א פראצעדור אריינצוקוקן אין די מעגליכקייט אנצוקלאגן גדולי ומנהיגי הדור בארץ הקודש, פארן זינד פון זאגן קלאר דעם דעת תורה הברורה אז מען טאר זיך נישט שטעלן אין מיליטער.
די מערכה כבידה קעגן די גזירת הגיוס בארץ הקודש האט זיך גאר פארשארפערט אין די לעצטערע חדשים, ווען אלע חרדישע גדולי הדור זענען ארויסגעקומען גאר שארף קעגן די מדינה, אויסגערופן א פולשטענדיגע מלחמה קעגן די צוואנג אויף אידישע קינדער זיי אריינצושלעפן אין מיליטער, די גדולי הדור האבן זיך ארויסגעלאזט אויף די וועגן און שטעגן מיט גרויס מסירת נפש צו קענען פינאנצירן די ישיבות און כוללים וואס האבן מיטאמאל פארלוירן שטיצע צוליב די שווערע גזירה.
אצינד הערט מען גאר שענדליכע נייעס פון ארץ ישראל, אז פראקורארן אין די געזעצשטיבער פון די מדינת ישראל רעגירונג פארלאנגען א קרימינאלע אויספארשונג קעגן די גדולי הדור, וויבאלד זיי האבן געזאגט קלאר די דעת תורה אז מען טאר זיך נישט שטעלן אין מיליטער, און עס איז א מצוה צו אנטלויפן פון זיך שטעלן אין מיליטער.
די אויספארשונג ווערט באטראכט אויף עטליכע גדולים, איבערהויפט דריי גרויסע מנהיגי ישראל, מרנן ורבנן ראשי ישיבת סלאבאדקע, הגאון הגדול רבי דוב לאנדא שליט"א, און הגאון הגדול רבי משה הלל הירש שליט"א, הגאון הגדול רבי יצחק יוסף שליט"א און נאך א רייע רבנים חשובים.
מאמענטאל ווערט באריכטעט אז די אויספארשונג האט נאכנישט קיין געהעריגע באדייט און עס איז נאכנישט פאקטיש א קרימינאלע קעיס, אבער דאס אז אזא שענדליכע שריט ווערט גענומען אין באטראכט ביי די ארטיגע געזעצגעבער, איז עס שוין פאר זיך אליינס א גאר שוידערליכע שריט וואס טוט אויפברענגען זארג ביי כלל ישראל אומעטום.
