נאך וואס כ"ק אדמו"ר מבוהוש שליט"א האט ערהאלטן א ספעציעלע היתר פונעם גאון הדור הגה"צ ר' געציל בערקאוויטש שליט"א דומ"ץ קרית יואל ובעל אגלי דבש, האט דער רבי שליט"א דעם מוצאי שבת חנוכה צום ערשטן מאל אפגעראכטן מעמד הדלקת הנרות ברוב עם אין ביהמ"ד הגדול דחסידי בוהוש אויף רחוב חגי אין בני ברק.
דער רבי שליט"א פלעגט זיך ביז היינט צוריקהאלטן פון צינדן אין בית המדרש, צוליב די פילצאליגע הלכה'דיגע שאלות דערויף צו עס הייסט א אייגענע הויז אדער נישט. מיט די יארן אבער איז די ציבור חסידים געוואקסן און עס איז נישט געווען מעגליך אז די חסידים זאלן קענען מיטהאלטן דעם רבינ'ס חנוכה ליכט צינדן בביתו נאוה קודש.
נאכן אנפרעגן דעת תורה ביים קרית יואל'ער דיין שליט"א, מיט וועם דער בוהושער רבי שליט"א האלט זיך גאר נאנט, האט דער קרית יואל'ער דיין טעלעפאנירט דעם בוהושער רבי'ן און אזוי אויך אפגעשריבן א ספעציעלע תשובה פארן רבי'ן, וואו ער שטעלט קלאר אז דער רבי קען צינדן אין בית המדרש בהידור רב, וויבאלד דאס איז א פולשטענדיגע פלאץ פאר רוחניות וגשמיות, וואו דער רבי איז משפיע פאר די חסידים.
