אין מיאמי פלארידע איז נפטר געווארן הרב ר' ישראל יעקב יוקל גרויס ז"ל, וועלכער איז געווען דער עלטסטער אייניקל פון הרה"ק רבי ישעי'לע פון קערעסטיר זי"ע אין אונזער דור, ער איז געווען א זון פון הרה"צ רבי נפתלי גרויס זצ"ל אדמו"ר מקערעסטיר בערבעשט, אן איידעם ביי הרה"ק רבי אברהם מקערעסטיר זי"ע, בנו וממלא מקומו פונעם הייליגן צדיק רבי ישעי'לע זי"ע.
ר' יוקל האט געוואוינט אין מיאמי וואו ער איז געווען דער בריח התיכון אין די לעגענדארער קערעסטירער בית המדרש, אלס מקרב געווען און מכבד געווען די מתפללים און געסט, און געווען באקאנט מיט זיין שמייכל און ליבליכקייט צו יעדן איינעם. ער האט דערלעבט א שיבה טובה גרייכנדיג דריי און ניינציג יאר, און אצינד איז ער נפטר געווארן לחיי העולם הבא איבערלאזנדיג א שיינעם דור.
די לוויה קומט פאר יעצט זונטאג נאכמיטאג צוויי אזייגער ביי די קענעדי לופטפעלד אין ניו יארק, און פון דארט וועט ער געפירט ווערן קיין ארץ ישראל לקבורה.
