נעכטן נאכמיטאג איז פארגעקומען א געמיינזאמע אסיפה בביתו נאוה קודש פון כ"ק אדמו"ר מוויזניץ שליט"א פון מאנסי, וואו עס זענען געקומען צו פארן אלע ברידער האדמורי"ם פון ניו יארק און קאנאדע, כ"ק האדמורי"ם מוויזניץ שליט"א פון קייאמישע, וויליאמסבורג, ירושלים, מאנטריאל, און בארא פארק.
די אסיפה איז צושטאנד געקומען איבער די בעפארשטייענדע מעמד האדיר "קשר נצחי" אפצוצייכענען דעם סיום סדר נזיקין והתחלת הש"ס במסגרת מאמר מרדכי דחסידי וויזניץ, וואס איז ארגינעל געווען געפלאנט אויף דעם דאנערשטאג ויחי אין די גיגאנטישע ברוקלין סטאורהאוז געביידע אין ברוקלין במקהלות אלפי חסידים ואנשי מעשה.
נאך וואס עס איז אנטשטאנען א רייע טעכנישע שטערונגען איבער די ארגינעלע פלענער, זענען די רבי'ס זיך צוזאמקומען צו דורכטון אינאיינעם די ווייטערדיגע פלענער, אויב מען זאל פאראויסגיין מיט די פלענער צו ארגאנאזירן א גרויסע מעמד מיט אלע רבי'ס און חסידים אינאיינעם, אדער מען זאל אפרעכטן דעם מעמד אין יעדע הויף באזונדער. א לענגערע צייט איז אויסגעשמועסט געווארן אלע צדדים, און צום שלוס האבן אלע רבי'ס פה אחד באשטימט צו אפרעכטן דעם מעמד אויף א גרויסע פארנעם אזוי ווי ארגינעל געפלאנט, מחזק צו זיין דעם סדר הלימוד און אנשליסן כלל חסידי וויזניץ אין דעם מסגרת פון מאמר מרדכי, ווען מ'הייבט אן ש"ס פון אנהייב מיט א כח הרבים.
צוליב וואס די ארגינעלע פלענער אפצורעכטן די מעמד דעם דאנערשטאג ויחי איז שוין נישט אקטיוו, האבן די עסקנים זיך אריינגעווארפן אצינד אויסצוארבעטן פון פריש א דאטום און א פאסיגע פלאץ וואו צו אפרעכטן די מעמד.
אויך איז אויפגעברענגט געווארן די פלאן פאר א גרויסע שבת מיט אלע ברידער אינאיינעם, ביומא דהילולא קדישא פונעם פאטער הרה"ק בעל תורת מרדכי מוויזניץ זי"ע, וואס געפאלט שבת החודש פרשת פקודי הבעל"ט. אלע ברידער האדמורי"ם האבן אויסגעדרוקט זייער ווילן צו פראווענען א שבת אינאיינעם, נאך די געלונגענע שבת יארצייט מיט פיר יאר צוריק, ווען אלע אכט רבי'ס האבן געפראוועט אינאיינעם א ערשטמאליגע שבת, די רבי'ס האבן באאויפטראגט די עסקני הקהילות צו דורכטון די טעכנישע דעטאלן, און זעהן אויב עס קען טאקע צושטאנד קומען די פלענער.
