אין שטאט באלטימאר אין מערילענד, ווערן געמאכט פיבערהאפטיגע הכנות צו די גרויסארטיגע וויזניצע שבת וואס וועט פארקומען קומענדיגע וואך פרשת בא, ווען כ"ק אדמו"ר מוויזניץ שליט"א פון מאנטריאל וועט זיין צוגאסט אין שטאט לטובת מוסדותיו הקדושים, און פראווענען א גרויסע שבת אין באגלייטונג פון הונדערטער חסידים ואנשי מעשה.
מיט פינף יאר צוריק האט דער רבי שליט"א געפראוועט אן ערשטמאליגע שבת אין שטאט באלטימאר, און שוין דאן אנגעקניפט א גאר נאנטע קשר מיט פילצאליגע תושבי העיר נדיבי ותומכי המוסדות, איבערהויפט די חברי הקהילה "מרכז תורה ותפילה", וואס שטייט בנשיאות כ"ק אדמו"ר מזידטשויב באלטימאר שליט"א. דריי יאר צוריק האט דער רבי ווידער געפראוועט א שבת אין באלטימאר, און אצינד גרייט מען זיך צום דריטן מאל וואס דער רבי וועט פראווענען א שבת בקרב תושבי העיר, און אריינבלאזן עמערס חיות און חיזוק פאר די ארטיגע אידן.
אין די יעצטיגע טעג ווערן געמאכט די נויטיגע צוגרייטונגען צו קענען אקאמאדירן דעם גרויסן ציבור וואס קומט צו פארן מיטן רבי'ן, סיי פון מאנטריאל קאנאדע, און סיי פון די שטעט לענגאויס ניו יארק, פאסיגע אכסניות ווערן אהערגעשטעלט בבתי נגידים ושועים אין די ארומיגע גאסן, די אכסניא פון רבי'ן וועט זיין אין שטוב פון הרבני הנגיד ר' אלי' מיללער הי"ו, און די תפילות און טישן דורכאויס שבת וועט פארקומען אין ביהמ"ד מרכז תורה ותפילה, וואו אין א ספעציעלע אויפגעבויעטע שאטער דערנעבן וועט זיין צוגעשטעלט די סעודות שבת פאר די הונדערטער געסט.
דער רבי שליט"א וועט זיין צוגאסט אין שטאט פאר נאנט צו א וואך צייט, און דערביי ארויפגיין לבתי נגידים בעם אויפצוטרייבן שטיצע לטובת די וויזניצע מוסדות אין מאנטריאל, און אזוי אויך באזוכן אין די מוסדות התורה און כוללים לענגאויס די שטאט.
