אין שטאט דאמבראווא אין פוילין, וועט היי יאר צום ערשטן מאל זיין צוגעשטעלט א ברייטע הכנסת אורחים סמוך ונראה צום ציון הק' פונעם הייליגן צדיק הרה"ק רבי מרדכי דוד מדאמבראווא זי"ע, זיך גרייטענדיג אצינד צום יומא דהילולא קדישא וואס געפאלט אויס קומענדיגע וואך מיטוואך פרשת בשלח ז' שבט.
אין די פארגאנגענע יארן איז געווען היבש שווער צוצוקומען צום ציון הק' מתפלל צו זיין, איבערהויפט אין די יארצייט טאג און אין די טעג ארום, ווען אין א געווענליכע יאר אין סאמע צענטער פון די ווינטער סעזאן, איז עס היבש אנגעלייגט מיט שניי באגלייט מיט א שווערע וועטער. אצינד האבן זיך א גרופע עסקנים צוזאמגענומען און פארזיכערט אז די מקום קדוש זאל זיין אהערגעשטעלט כראוי וכיאות לכבודו של צדיק, אידישע קינדער זאלן קענען קומען מתפלל זיין און מעורר זיין רחמים פאר כלל ישראל.
צום היי יעריגן הילולא ביום ז' שבט, מיטוואך פרשת בשלח, וועט זיין צוגעשטעלט די ציון הק' אין א ווארעמע אטמאספער, אנגעווארעמט און באלאכטן, און אויסער דעם ווערט צוגעשטעלט די דערנעבענדיגע בנין בית הכנסת מיט פיל זייטיגע באדערפענישן, ווי ווארעמע קאווע, מזונות, און געוויסע שעות אין טאג אויך א סעודה זיך צו וואשן לכבוד די יארצייט בכל מיני מטעמים.
די ציון הק' געפונט זיך אונטערוועגנס פון קראקא קיין ליזענסק אדער צאנז, בלויז פופצן מינוט פון די הויפט גאס וואס פירט צווישן די צוויי שטעט, און אצינד וועלן מערערע קבוצות וואס פארן אויף קברי צדיקים, זיך קענען אפשטעלן מיט א רואיגקייט צו פוקד זיין דעם ציון הק' אין דאמבראווא ביומא דהילולא קדישא.
