אין בעפארברייטונג צו די גרויסע וויזניצע חתונה וואס קומט פאר מיטוואך פרשת משפטים אין שטאט וויליאמסבורג, גרייט זיך דער זיידע פון כלה כ"ק אדמו"ר מוויזניץ שליט"א פון בית שמש ארויסצופארן אויף א לענגערע באזוך קיין ניו יארק לפאר על ראש שמחתו, באשיינען די שמחת החתונה, און פראווענען דעם שבת של שמחה בחצר הקודש וויזניץ אין וויליאמסבורג, אינאיינעם מיט אחיו הגדול כ"ק אדמו"ר מוויזניץ שליט"א פון וויליאמסבורג.
די כלה איז א אייניקל פון דריי וויזניצע רביים, א טאכטער פון הגה"צ ר' חיים מאיר האגער שליט"א, בנו יחידו פון כ"ק אדמו"ר מוויזניץ שליט"א פון וויליאמסבורג, און איידעם ביי כ"ק אדמו"ר מוויזניץ שליט"א פון בית שמש, איידעם ביי כ"ק אדמו"ר מוויזניץ שליט"א לרפואה שלימה. די חתן איז א זון פון כ"ק אדמו"ר מטארנא שליט"א פון פלעטבוש.
מארגן זונטאג וועט פארקומען א ספעציעלע מעמד תפילה אין אתרא קדישא מירון לקראת די שמחת החתונה, אין שפיץ פון כ"ק אדמו"ר מוויזניץ שליט"א פון בית שמש וועלכער וועט ארויספארן קיין מירון בראש קהל חסידיו. קומענדיגע וואך מוצאי שבת קודש פרשת יתרו וועט פארקומען א גרויסע שמחת הפארשפיל און מסיבת פרידה לכבודו פונעם רבי'ן, אין ביהמ"ד הגדול וויזניץ אין בית שמש.
צומארגנס זונטאג פרשת משפטים וועט דער רבי ארויספארן קיין ניו יארק, די ערשטע צוויי טעג פון די באזוך וועט דער רבי וויילן אין מאנסי, בבית האכסניא ביי הנגיד החסיד ר' חיים מאיר ציג הי"ו, און אזוי אויך די לעצטע פאר טעג פון די נסיעה, פון זונטאג ביז מיטוואך פרשת תרומה.
דינסטאג משפטים וועט דער רבי אריינפארן קיין וויליאמסבורג ביז נאך שבת, און באשיינען די חתן מאהל דינסטאג נאכט, די חתונה מיטוואך, און שבת שבע ברכות אין ביהמ"ד הגדול דקהל תורת חיים וויזניץ. די אכסניא אין וויליאמסבורג וועט זיין אין שטוב פון הנגיד החסיד ר' ישראל ניימאן הי"ו.
צוליב די מצב הבריאות ביים רבינ'ס שווער כ"ק אדמו"ר מוויזניץ שליט"א, וואס איז נישט אזוי אמבעסטן די טעג, און עס איז נישט קלאר צו ער וועט אנקומען קיין ניו יארק באשיינען די שמחה, זענען די פלענער דערווייל אז די גרויסע חתונה וועט פארקומען אין ביהמ"ד הגדול וויזניץ אין וויליאמסבורג.
דאנערשטאג פרשת משפטים וועט פארקומען די שמחת השבע ברכות בהיכל ישיבה גדולה תפארת מרדכי וויזניץ אין סטעטן איילענד, וואס שטייט בנשיאות כ"ק אדמו"ר מוויזניץ שליט"א פון בארא פארק, וואו דער חתן האט געלערנט דורכאויס די ישיבה יארן. זונטאג פרשת תרומה וועט פארקומען די שמחת השבע ברכות דורכ'ן זיידן כ"ק אדמו"ר מוויזניץ שליט"א פון בית שמש, אין די היכל הטישן בבנין ביהמ"ד הגדול וויזניץ אין מאנסי. די לעצטע שבע ברכות דינסטאג פרשת תרומה וועט פארקומען בהיכל ישיבה גדולה תורת מרדכי וויזניץ אין בלומינגראוו.
