תלמידי וחסידי סאטמאר לעבן מיט פרישע מאמענטן פון הרחבת גבולי הקדושה, ווען נעכטן דינסטאג איז אין א מזל'דיגע שעה געשלאסן געווארן די מקח אויף א גרויסע שטח אין הארץ פון די חסידישע געגנט אין בארא פארק, וואו עס וועט ווערן אויפגעבויעט א שפאגל נייע פראכטפולע בית המדרש פאר די לאקאלע בית המדרש "דברי יואל" שע"י קהל יטב לב ד'סאטמאר, בנשיאות כ"ק אדמו"ר מסאטמאר שליט"א.
די בית המדרש דברי יואל וואס געפונט זיך אצינד ביים ווינקל פון די פערצנטע עוועניו און די ניין און פערציגסטע סטריט, איז אין די לעצטערע יארן אויסגעשטיגן אלס א ריכטיגע חסידישע צענטער פאר סאטמארע אינגעלייט און בעלי בתים, וואס זענען קובע מקום לתורה ולתפלה צווישן אירע פיר ווענט, אצינד ווען עס האט זיך אויסגעפעלט אונטערצונעמען א פרישע פראיעקט צו אוועקשטעלן דעם בית המדרש אין א אייגענעם לאקאל, האט די הנהלת הקהילה אין א מזל'דיגע שעה אונטערגעשריבן קאנטראקט אפצוקויפן א גרויסע שטח אין צענטער פון שטאט.
די נייע שטח אויף די זיבן און פערציגסטע סטריט, צווישן די דרייצנטע עוועניו און פערצנטע עוועניו, איז א שטח פון צוויי הייזער וואס וועט ווערן צוגערישט אויפצובויען דארט א שפאגל נייע בנין בית המדרש מיט אלע נויטיגע איינריכטונגען מיטן אויבערשטנס הילף.
