אין בעפארברייטונג צו די געהויבענע באזוך פון הגה"צ ר' אהרן מרדכי רוקח שליט"א בנו יחידו פון כ"ק אדמו"ר מבעלזא שליט"א, וועלכער וועט אנקומען צוגאסט קיין ניו יארק קומענדיגן חודש אדר, לטובת די אויפבוי פון די שפאגל נייע יונגל קעמפ מחנה בני בעלזא אין וואודרידזש, איז באשטעטיגט געווארן די פלענער איבער די פראכטפולע מאורע וואס וועט פארקומען פאר א געלאדנטע קבוצה נגידים ותומכים.
ווי באקאנט גייט אן העפטיגע בוי ארבעט אויפצובויען די נייע גיגאנטישע יונגל קעמפ, ווען מ'האלט קוים א האלבע יאר זינט די מעמד הנחת אבן הפינה און די בוי ארבעט גייט אן אין פולן שוואונג, די סעריע מעמדים "הרחבת המלוכה" איז געלאזט געווארן אין גאנג, ווען צום הויכפונקט וועט מען מקבל פנים זיין דעם חשובן גאסט בנו יחידו פונעם רבי'ן בשליחת הקודש, וועלכער וועט באשיינען א רייע פראכטפולע מעמדים לטובת די קרן הבנין, און צום קלימאקס א געהויבענע שבת התאחדות מיט כלל חסידי בעלזא תושבי בארא פארק.
די גראנדיעזע מעמד ועידת המייסדים וועט פארקומען זונטאג פרשת כי תשא, צומארגנס פון דעם גרויסן שבת, און וועט אפגעהאלטן ווערן אין די פראכטפולע "עבאוו" באללרום אין א רייכע האטעל אין סטעטן איילענד, וואס וועט ווערן הערליך צוגעגרייט לכבודם פון די ארום צוויי הונדערט נדיבי לב, נגידים ותומכים וואס שליסן זיך אן מיט גרויסע סכומים צו פאראויסשטופן די מאסיווע בליה און וואוקס פון די מוסדות הקדושים.
