חסידי וויזניץ אין לאנדאן באגריסן מיט פרייד די פרישע אנטוויקלונג און הרחבת גבולי הקדושה, ווען די הנהלת הקהילה האט אין די יעצטיגע טעג געשלאסן מקח אויף צוויי בנינים אין די טאטענהעם געגנט, וואס וועט דינען אלס וויזניצע בית המדרש פאר די לאקאלע איינוואוינער, חסידי וויזניץ וואס וואוינען אין יענעם געגנט.
דאס קומט נאכדעם וואס די חסידישע ישוב אין לאנדאן ווערט שטארק פארשפרייט, און פון סטעמפארד הילל פארשפרייט מען זיך צו די ארומיגע גאסן, די טאטענהעם געגנט און די ווארטרי געגנט. אין די לעצטערע יארן האבן זיך צוזאמגענומען א גרויסע קבוצה וויזניצע חסידים וואס האבן געקויפט הייזער דארט, און באשלאסן אוועקצושטעלן א אייגענע בית המדרש פאר די לאקאלע חסידים, אונטערן נאמען בית המדרש דחסידי וויזניץ שכונת טאטענהעם.
די צוויי בנינים איינס נעבן די אנדערע, געפונט זיך אויף די גרויסע סטעמפארד הילל גאס, וואו עס טוישט זיך אריבער צו היי ראוד, און איז פונקט אינצווישן די צוויי פרישע שפרודלדיגע געגנטער אין טאטענהעם און ווארטרי. אין די קומענדיגע וואכן וועט ווערן דורכגעפירט העפטיגע רענאוואציע ארבעט אהערצושטעלן די בנינים אלס א לופטיגע גרויסע בית המדרש מיט אלע צוגעהערן וואס פעלט זיך אויס. און אזוי אויך וועט דארט ווערן אויפגעבויעט א מקוה טהרה צו פארגרינגערן פאר די לאקאלע תושבי השכונה.
