פרא פאלעסטינער מעלדונגען מיט א רוף צו מאסן שטיצער טוט צוגרייטן דעם בארא פארקער אידנטום אויף א מעגליכע כאאס, ווען א גרויסע פרא פאלעסטינער פראטעסט איז פאררופן געווארן פארצוקומען אין הארץ פון די אידישע געגנט אין בארא פארק, אונטערן סלאגאן אז פאלעסטינע איז נישט פאר סעיל.
אקטיוויסטן אין שטיצע פון פאלעסטינער פאררופן דעם פראטעסט, קעגן א געפלאנטע ריעל עסטעיט עקספא דורך די געטטער גרופ, איבער פארקויפן ריעל עסטעיט אין ארץ ישראל. צוליב זארג וואס די ווילדע פראטעסטן קענען אנברענגען אין די היימישע געגנט, האבן די עקספא ארגענעזירער געטוישט די פלענער אויף דערווייל, און עס איז נאכנישט געמאלדן געווארן צו עס וועט פארקומען, און אויב יא אין וועלכע לאקאציע און וועלכע טאג, מיטן האפענונג אז עס וועט קענען פארקומען אונטער רואיגע אומשטענדן.
אין ליכט פון די געפלאנטע פראטעסטן וואס שטעלט אין זארג פילע איינוואוינער עס זאל חלילה נישט ארויסגיין פון קאנטראל און שעדיגן אידישע קינדער, איז דער אידישער אסעמבלימאן ר' שמחה אייכענשטיין ארויסגעקומען מיט א רוף צו לאקאלע באאמטע, די פאליציי אגענטור און דער ניו יארק סיטי מעיאר, אז זיי זאלן אונטערנעמען פארשטערקערטע זיכערהייט שריט זיכער צו מאכן אז די אידישע איינוואוינער זענען נישט אין געפאר.
היינט איז פארגעקומען א פאראייניגטע זיצונג צווישן מערערע זיכערהייט אגענטורן אין ניו יארק סיטי, אריינגערעכנט די פאליציי דעפארטמענט, און פארשידענע אידישע הילף אגענטורן, אוועקצושטעלן פארשטערקערטע זיכערהייט ארום די אנגעגעבענע לאקאציע.
