מיט עטליכע חדשים צוריק איז געווארן באריכטעט איבער א פלאן צו רופן א גאס אין קראון הייטס, אויפן נאמען פון כ"ק אדמו"ר מליובאוויטש זצ"ל, נאך וואס די לאקאלע אויטאריטעטן האבן אויסגעדרוקט אינטערעסע דערויף.
די רעדע איז פון פרעזידענט סטריט אין קראון הייטס, צווישן ניו יארק עוועניו און ברוקלין עוועניו, דארט אויפן גאס וואו דער ליובאוויטשער רבי זצ"ל האט געוואוינט פאר לאנגע יארן, געדינט דעם אויבערשטן און משפיע געווען פאר אידישע קינדער.
די פלאן איז אויפגעברענגט געווארן דורך קאונסילמעמבער קריסטאל האדסאן, און איז דעבאטירט צווישן די פאליטישע באאמטע אין ניו יארק סיטי, הויפטזעכליך אין די קראון הייטס ראיאן. אזוי אויך האט דער ברוקלין בארא פרעזידענט אנטאניא רענאוסא אפגעשיקט א ספעציעלע בריוו צו די קאמיוניטי באורד 9, וואו ער שרייבט איבער זיין שטיצע צו רופן א גאס אויפן נאמען פון כ"ק אדמו"ר מליובאוויטש זצ"ל.
אצינד איז עס פולקאם באשטעטיגט געווארן דורך די לאקאלע אויטאריטעטן, און קומענדיגן זונטאג פרשת צו ח' ניסן וועט פארקומען די גרויסע צערעמאניע מיט די באטייליגונג פון טויזענטער ליובאוויטשער חסידים, דארט אויפן גאס פארנט פון ביתו נאוה קודש פון כ"ק אדמו"ר מליובאוויטש זצ"ל, אויף 1304 פרעזידענט סטריט, באגלייט מיט מוזיקאלישע געזאנג און פארשידענע דרשות.
