שטייענדיג א גאנץ קיילעכיג יאר זינט כ"ק אדמו"ר מביאלא שליט"א איז געווארן אויפגענומען אלס רבי, למלא מקום אביו באדמורו"ת ביאלא, אנצופירן די עדה הקדושה און די מוסדות הקדושים דחסידי ביאלא, ווערט געמאלדן אז מען גרייט זיך אצינד צום ערשטן נסיעה וואס דער רבי נעמט אונטער אלס רבי צו די מקומות הקדושים אין אייראפע, וואס וועט זיין געווידמעט פאר די חשובע נדיבי לב, תומכי מוסדות ביאלא בארץ הקודש.
די מסע הקודש מיטן נאמען מסע הבכורה "לבבנו אליו", וועט בעז"ה פארקומען אין לויף פון די וואך פרשת במדבר, אנגעהויבן פון זונטאג כ"ז אייר, ביז דינסטאג כ"ט אייר, און לויטן פלאן וועט מען בעז"ה פוקד זיין די קברי צדיקים אין די פאלגענדע פלעצער אין אוקראינע, דעם ציון הק' פונעם אור שבעת הימים דער הייליגער בעל שם טוב הק' זי"ע אין שטאט מעזיבוזש, דעם ציון הק' פונעם הייליגן בארדיטשובער רב זי"ע דער סניגורן של ישראל, דעם ציון הק' פונעם הייליגן רוזינער זי"ע אין שטאט סאדיגורא, און דעם ציון הק' פון הרה"ק רבי מאיר'ל מפרימישלאן זי"ע.
די עסקני המוסדות ארבעטן די טעג אויסצורעכענען די גענויע דעטאלן פונעם קורצן, אבער געהויבענער און ערשטמאליגע נסיעה, מיטן געבן די געלעגנהייט פאר כלל חסידי ביאלא זיך אנצושליסן מיט שיינע סכומים ארויסצוהעלפן די מוסדות, און קענען מיטהאלטן דעם געהויבענעם נסיעה להיוושע בכל מילי דמיטב.
