אידן אין אנטווערפן בעלגיע זענען אויפגעשוידערט ביז גאר ווען היינט פארטאגס האט זיך אפגעשפילט א שרעקליכע געשיכטע פון רדיפת הדת, ווען די לאקאלע פאליציי איז איבערגעפאלן עטליכע חסידישע מוהלים, פארלאנגט זייער מוהל מעסער, און געפאדערט א דעטאלירטע ליסטע פון אלע קינדער וואס זיי האבן גע'מל'ט דורכאויס די פארלאפענע יאר.
ליידער האבן געוויסע עלעמענטן משולי המחנה גענומען א מיסיע צו רודפ'ן די אידישע געמיינדע, און האבן אריינגעגעבן א קלאגע אין געריכט קעגן די הייליגע מצוה פון מילה, טראץ וואס אין די לעצטערע וואכן האט מען געהערט איבער פאזיטיווע דערגרייכונגען אין געריכט, האט מען אבער היינט פארטאגס מיטגעהאלטן א שוידערליכע געשיכטע, ווען די לאקאלע פאליציי האט געשטורעמט די הייזער פון ווייניגסטנס צוויי באקאנטע מוהלים.
שרייענדיג ביים טיר אז מען זאל עפענען איידער זיי ברעכן אויף די טיר, האבן די פאליציי לייט פארלאנגט פון די מוהלים זיי זאלן איבערגעבן די מילה מעסער'ס, און דערביי געפאדערט א ליסטע פון אלע קינדער וואס זיי האבן גע'מל'ט דורכאויס דעם לעצטן יאר. ווי די פראקורארן אויפן קעיס זאגן זענען זיי אויסן אפצושטעלן דאס וואס אומערפארענע מענטשן פירן דורך מעדיצינישע פראצעדורן אן די מינימאלע טרענירונג און באשטעטיגונג פון א דאקטער.
אין נאמען פון די צענטראלע קהילה מחזיקי הדת איז געמאלדן געווארן אז די עסקנים טוען אלעס אין די וועלט צו מסדר זיין דעם שווערן נושא, און אלע תושבי העיר זאלן מתפלל זיין אז מען זאל מצליח זיין אן קיין נאכווייען, ואין לנו להישען אלא על אבינו שבשמים.
