א שווערע אבידה האט היינט באטראפן די חסידישע וועלט, ווען עס איז נפטר געווארן הרב החסיד המפורסם ר' יענקעלע פארטוגאל ע"ה, וועלכער איז געווארן אויפגעצויגן ווי א אייגן קינד אין שטוב פון כ"ק אדמו"ר הרה"ק מסקולען זי"ע בעל נועם אליעזר, נאך פון די פריערדיגע יארן אין דער אלטער היים אין ראמעניע.
דער חשובער נפטר איז געווען זעקס און אכציג יאר אלט, און איז שוין אלס קליין קינד אריינגענומען געווארן אין שטוב פון הרה"ק מסקולען זי"ע, וואס ווי באקאנט האט דער סקולענער רבי אריינגענומען אסאך קינדער יתומים זיי צו דערווארעמען און זיי אויפהאדעווען מיט ליבשאפט כדרכו בקודש.
אלע יארן איז ר' יענקעלע געווען פאררעכנט ווי א געהעריג קינד פונעם סקולענער רבי'ן, און זיין שטיף ברודער כ"ק אדמו"ר הרה"ק בעל מאור ישראל מסקולען זי"ע האט זיך צו אים געפירט ווי א ברודער. מער ווי איינמאל האט ר' יענקעלע אויפגעטרעטן מיט שיינע זכרונות פון די פריערדיגע יארן, צו ביי מעמדי סעודת הודאה מוצאי שבת נחמו אדער אין אנדערע געלעגנהייטן, און חסידי סקולען האבן שטענדיג ארויפגעקוקט אויף זיין דמות וואוסענדיג אז ער טראגט אסאך היסטאריע.
די לוויה קומט פאר היינט צוויי אזייגער נאכמיטאג ביים סקולענער בית המדרש אויף קיעפ סטריט אין וויליאמסבורג, דערנאך וועט ער קומען לקבורה אויפן וויזניצע בית החיים אין מאנסי, נעבן זיין שטיף פאטער הרה"ק מסקולען זי"ע.
